Eurodeputetët theksojnë shqetësimin e vetëcensurës në median shqiptare dhe kritikojnë kërcënimet me gjyq për shpifje kundër BIRN Albania pas investigimit në të shkuarën kriminale të disa kandidatëve për kryebashkiakë në zgjedhjet e vitit 2015.
Parlamenti Europian shprehu shqetësime mbi kulturën e vetëcensurës mes gazetarëve në Shqipëri në projekt-rezolutën e vet mbi progresin e reformave të vendit tonë gjatë vitit 2015.
Projekt mocioni për rezolutë i hartuar nga raportuesi për Shqipërinë Knut Fleckenstein, shprehu shqetësim për “vetëcensurën e gjithëpërhapur mes gazetarëve” dhe bëri thirrje për “forcimin e standardeve të tyre profesionale dhe etike.”
Shqetësimet e shprehura nga eurodeputetët erdhën pas publikimit të një studimi të thelluar mbi vetëcensurën të publikuar nga BIRN Albania në tetor 2015, i cili analizonte rrënjët dhe shkaqet e vetëcensurës mes gazetarëve shqiptarë.
Raporti ofron jo vetëm panoramën e plotë mbi rrënjët dhe shkaqet e vetëcensurës në median shqiptare por edhe format në të cilat ushrohet ajo, si dhe propozon një seri rekomandimesh mbi mjetet dhe mekanizmat që duhet të ngrihen për ta luftuar atë.
Gjithashtu, në një amendim të rezolutës të propozuar nga eurodeputetët Marietje Schaake dhe Ilhan Kyuchyuk, nga Grupi i Aleancës së Liberalëve dhe Demokratëve për Europën, dënon gjithashtu ashpër kërcënimin për gjyq për shpifje kundër BIRN Albania nga zyrtarët vendës pas publikimit të një investigimi që ekspozoi të shkuarën kriminale të disa kandidatëve për kryebashkiakë që morën pjesë në zgjedhjet e vitit 2015 për pushtetin vendor.
Parlamenti Europian “shpreh keqardhje që Rrjeti Ballkanik i Gazetarisë Investigative, një organ mediatik i pavarur dhe investigativ, është kërcënuar me gjyq për shpifje, pas investigimeve të kryera mbi të shkuarën kriminale të një kandidati për kryebashkiak gjatë zgjedhjeve vendore të vitit 2015,” shkruhet në amendimin e propozuar nga Schaake dhe Kyuchyuk. (Kliko këtu për të parë amendimin)
Në prag të zgjedhjeve për pushtetin vendor, BIRN Albania publikoi një investigim që zbuloi provat se tri kandidatë për kryebashkiakë në zgjedhje kishin të shkuar kriminale.
Provat e siguruara nga BIRN treguan se dy kandidatë që garonin për koalicionin e majtë të udhëhequr nga socialistët, Artur Bushi dhe Elvis Rroshi, si kandidatë për Krujën dhe Kavajën, qenë arrestuar në të shkuarën për trafik droge.
Një kandidat për Partinë Demokratike në opozitë në bashkinë e Këlcyrës, Gentian Muhameti, ndërkohë qe dënuar për trafik droge.
Pas publikimit të lajmit, kryebashkiaku i Kavajës Elvis Rroshi publikoi një deklaratë ku kërcënonte se do të hidhte në gjyq BIRN për shpifje duke kërkuar dëmshpërblim prej 100 mijë euro. Kërcënimi i Rroshit, i cili përfshinte një ultimatum treditor për BIRN për të tërhequr lajmin, u përsërit disa herë nga kryeministri Edi Rama në disa intervista televizive.
BIRN Albania i qëndroi raportimit të kryer ndërsa kërcënimi me gjyq i Rroshit nuk u materializua kurrë.
