Një kombinim i shqetësimeve financiare dhe zakoneve kulturore po i mban shumicën e boshnjakëve të rinj në shtëpitë e prindërve pavarësisht se i kanë kaluar të 30-at.
Shumë boshnjakë të rinj nuk largohen nga shtëpia prindërore deri pas moshës 30-vjeçare, trend ky që lidhet me situatën e vështirë ekonomike si dhe zakonet kulturore.
“Situata ekonomike është e vështirë dhe familja ime ka një kredi për të paguar,” thotë 32-vjeçarja Alma nga Sarajeva.
“Edhe nëse do të kisha një punë, kjo nuk do ta lehtësonte largimin nga shtëpia e prindërve dhe gjetjen e një shtëpie me qira,” shtoi ajo.
Sipas të dhënave nga autoritetet, rreth 85 për qind e boshnjakëve nga mosha 15 deri në 30 jetojnë me prindërit, krahasuar me një mesatare prej 66 për qind në BE.
Të njëjtat shifra reflektohen edhe në vende të tjera në rajon. Në Serbi 80.5 për qind, në Kroaci 83.8 për qind dhe në Mal të Zi, 73 për qind.
Qëndrimi në shtëpinë e prindërve mund të shihet si i vetmi vendim logjik në një vend për të cilin Banka Botërore thotë se ka një nga normat më të larta të papunësisë te të rinjtë në botë, 57.5 për qind.
“Qëndrimi në shtëpi edhe pas moshës 30-vjeçare është mjaft i pranueshëm nga shoqëria këtu,” thotë 26-vjeçari Alen nga Vitez, në Bosnjën qendrore.
“Largimi i shtëpisë vonë në jetë është gjë e zakonshme në Bosnje, por tradita kulutore duhet të shihet kryesisht si një përgjigje për mungesë të burimeve dhe vështirësive financiare,” tha Alen.
“Do të doja të largohesha nga prindërit e mi, por kjo është praktikisht e pamundur dhe është njëlloj për thuajse të gjithë personat e moshës sime,” shtoi ai.
“Thuajse kushdo që njoh jeton me familjen – përfshirë mua,” tha Admiri 34-vjeçar nga Sarajeva.
“Megjithëse gjendja ekonomike është kryesore, shumë të tjerë gjithashtu vendosin të qëndrojnë me familjet edhe pasi kanë gjetur një punë apo janë martuar… veçanërisht nëse janë burra,” shtoi ai.
Rejan Igor Roiç, anëtar i komisionit shtetëror për koordinimin e çështjeve të të rinjve, thotë se fakti që shumë boshnjakë të rinj nuk largohen nga streha familjare gjithashtu reflekton faktin se autoritetet kanë bërë shumë pak për të ndihmuar pavarësinë e tyre.
“Qeveria jonë nuk kujdeset për të rinjtë,” i tha BIRN Roiç të premten. “Autoritetet duhet të ndihmojnë të rinjtë të fillojnë familjet e tyre, pa u varur te prindërit,” shtoi ai.
“Të vetmet programe ekzistuese janë në nivel fillestar – Republika Srpska ofron subvencione për njerëzit që përpiqen të blejnë shtëpinë e parë ndërsa entiteti Federal ofron kredi me norma më të ulëta,” vazhdoi Roiç duke shpjeguar se më shumë mund të bëhet.
