Bullgaria ka lajmëruar dy investime të mëdha kineze në Burgas dhe Plovdiv, duke shtuar shpresat se vendi mund të bëhet një qendër shpërndarjeje për mallrat kineze në Europë.
Dy kompani kineze – gjiganti i tregtisë elektronike Alibaba dhe Porter City Holding po marrin në konsideratë investimin në projekte logjistike madhore në Bullgari, lajmëruan institucionet bullgare.
Alibaba po planifikon të ndërtojë një bazë logjistike pranë qytetit bregdetar Burgas ndërsa komuna Plovdiv lajmëroi të martën se Porter City do të ndërtojë një “qytet ekonomik” në zonën Plovdiv për tre vitet e ardhshme.
Stamen Milanov, drejtor i Agjencisë Bullgare të Investimit, BIA, tha se Alibaba do të investojë më shumë se 100 milionë euro në bazë, që do të shërbejë si qendër shpërndarjeje për blerjet e klientëve europianë.
Ai i tha medias se Agjencia kishte mbajtur një takim me kompaninë, që po konsideronte “një investim solid”.
Zgjedhja e Burgas, me vendndodhje në bregun e Detit të Zi nuk është befasi. Ka portin e dytë më të madh në Bullgari, që do të lidhet me qytetin kinez Zhengzhou nga një linjë treni që ndjek të ashtuquajturën “rruga e mëndafshit”.
Treni do të operohet nga kompania shtetërore kineze Qendra Kombëtare Kineze Zhengzhoi për Zhvillimin dhe Ndërtimin dhe firma bullgare Despred, që nënshkruan një marrëveshje në mars.
Burgas do të jetë i pari destinacion europian i ngarkesës, që fillon në provincën kineze Henan dhe kalon nëpër Kazakistan, Azerbajxhan dhe Gjeorgji.
Qyteti i planifikuar industrial pranë Plovdiv gjithashtu lidhet me rrugën e re kineze të mëndafshit. Do të jetë një projekt pilot për të gjithë Europën, bazuar në konceptin e ri të qeverisë kineze të quajtur “një rrugë, një brez”, shpjegoi komuna Plovdiv.
Ideja kryesore e konceptit është të lidhet Kina me botën për të ndërtuar marrëdhënie të forta ekonomike me Rrugën e Mëndafshit.
Kina ka investuar rreth 113 milionë euro në Bullgari gjatë pesë viteve të fundit, sipas Bankës Kombëtare Bullgare, një shumë disi e ulët krahasuar me investimet kineze në Serbi dhe Greqi.
Por interesi i Kinës në Bullgari po rritet për shkak të pozicionit strategjik me Rrugën e Mëndafshit, si dhe nga anëtarësia në BE, taksat e ulëta dhe pagat konkurruese, tha një zëdhënës i BIA për BIRN.
Agjencia e investimit po negocion projekte me bizneset kineze në fushat e bujqësisë, turizmit, infrastrukturës dhe elektronikës.
