Partia në pushtet e kryeministrit Vuçiç pritet të sigurojë një fitore të lehtë në zgjedhjet e parakohëshme për parlamentin kombëtar si dhe për këshillet vendore e të provincave.
Votuesit në Serbi janë ftuar të zgjedhin për parlamentin e vendit si dhe për këshillet e një numri të madh njësish të qeverisjes vendore.
Në zgjedhjet për parlament, 20 lista politike me 3,270 kandidatë konkurrojnë për 250 vende.
Në provincën autonome të Vojvodinës, pesëmbëdhjetë lista po marrin pjesë në garë për 120 vendet e këshillit të provincës.
Në total, 6,771.497 votues janë në listë.
Serbët e Kosovës pritet të marrin pjesë në këto zgjedhje në 90 qendra votimi të ngritura në territorin e Republikës së Kosovës. Votat në Kosovë do të administrohen nga OSBE.
Nënshtetasit serbë që jetojnë në Britani, Kanada dhe SHBA votuan ditën e shtunë ndërsa në disa vede të tjera si Austri, Belgjikë, Bosnjë, Itali, Afrikë e Jugut, Maqedoni, Rusi, Gjermani etj, votimet do të zhvillohen të dielën.
Rezultatet e votimeve jashtë vendit nuk lejohet të publikohen deri sa votimet në Serbi të përfundojnë.
Serbia do të mësojë rezultatet finale më 28 prill, kur ato të publikohen nga komisioni zgjedhor.
Partia Progresive, e cila drejton vendin me kryeministrin Aleksandar Vuçiç thirri zgjedhje të parakohëshme për të befasuar opozitën dhe për të fuqizuar pozicionin e vet. Kritikët thonë Progresistët po arrijnë të konsolidojnë pushtetin e tyre më tej duke rrëmbyer Vojvodinën dhe bashkësi të tjera nga duart e opozitës.
Sondazhet sugjerojnë se Partia Progresive do të fitojë zgjedhjet drejtpërsëdrejti. Shumë parti të vjetra mund të mos arrijnë të sigurojnë pragun për të hyrë në parlament ndërsa disa parti të ekstremit të djathtë mund të rikthehen në parlament pas dy vjetësh mungesë.
Fushata është karakterizuar nga agresivitet i lartë verbal dhe akuza të ndërsjellta, veçanërisht mes Progresistëve dhe Partisë Demokratike, por edhe mes Progresistëve dhe Partisë Socialiste, megjithëse këto të fundit kanë qenë partnerë në qeverinë paraardhëse.
Partitë opozitare kanë paralajmëruar për rrezikun e parregullsive pas disa problemeve të raportuara me listat zgjedhore dhe me adresat e votuesve.
Zgjedhjet do të monitorohen nga 687 vëzhgues vendës dhe 196 të huaj.
Agjencia shtetërore kundër korrupsionit pritet të verifikojë raportimet e partive mbi financimin e fushatës elektorale.