Kinematografia rumune përfaqësohet në Festivalin e Filmit në Kanë me pesë prodhime, por për herë të parë regjisorët vendas janë përzgjedhur të garojnë për Palmën e Artë.
Për herë të parë në historinë e shtatë dekadave të Festivalit të Filmit në Kanë, që starton të mërkurën, dy filma rumunë janë në garë për çmimin Palma e Artë: “Bacalaureat” nga Cristian Mungiu dhe “Sierranevada” nga Cristi Puiu.
“Kjo është hera e parë që dy filma rumunë janë përzgjedhur për konkurrencën kryesore, ndërsa në të gjithë festivalin kinematografia rumune përfaqësohet nga pesë tituj”, tha Këshilli Kombëtar i Kinematografisë rumune para fillimit të festivalit.
“Bacalaureat” ka të bëjë me përgjegjësitë e të qenit prind dhe tregon historinë e një mjeku nga një qytet i vogël i cili duhet të vendosë mënyrën më të mirë që djali të çajë në jetë.
“Është një histori bashkëkohore në lidhje me një prind dhe shqetësimet e tij, një prind i cili pyet veten, duke pasur parasysh gjendjen e sotme të Rumanisë, për atë që duhet të tregojë fëmijës së tij për jetën. Kjo është një histori personale, por edhe një fotografi e shoqërisë sot”, tha Mungiu për filmin e tij.
Filmi shënon pjesëmarrjen e tretë të Mungiu në konkurrencën zyrtare. Prodhimi i tij i vitit 2007 “4 muaj, 3 javë dhe 2 ditë”, fitoi Palmën e Artë në vitin 2007, ndërkohë që pjesëmarrja e tij e dytë në Kanë, “Përtej Kodrave” , fitoi çmimin për skenarin më të mirë dhe aktoren më e mirë në vitin 2012.
Mungiu ka qenë i pranishëm në Festivalin e Kanës si anëtar i jurisë së garës kryesore. Në vitin 2013, ai u zgjodh si një nga anëtarët e jurisë për Festivalin e 66-të.
Filmi i dytë rumun i përzgjedhur në garën kryesore, “Sierranevada”, është “në lidhje me një përkujtim që nuk ndodh kurrë, një tregim për ata që zgjedhin për t’i shpëtojnë trillimit dhe të fshehin frikën prapa “realitetit konkret” kur kaplohen nga një pikëllim që nuk mund të kuptojnë,” tha Puiu në Shënimet e Regjisorit.
Në vitin 2006, filmi i tij “Vdekja e Z. Lazaresku” , i përcaktuar si një nga dhjetë filmat më të mirë të vitit nga New York Times, fitoi çmimin “E Meritës së Veçantë” në Kanë. Katër vjet më vonë, “Aurora” fitoi edhe gjithashtu të njëjtin çmim.
Në të njëjtën kohë, ” Qentë” e Bogdan Mirica është përzgjedhur në kategorinë “E Meritës ë Veçantë”.
Konkursi i filmave të shkurtër do të shfaqë gjithashtu një film rumun, “4:15 PM Fundi i botës”, me regji të Catalin Rotaru dhe Gabi Virginia Sarga, ndërsa filmi “Të gjithë lumenjtë derdhen në det” nga Alexandru Badea do të konkurrojë për seksionin Cinefondation.
Vitet e fundit kanë parë një rilindje në kinemanë rumune. E kaluara komuniste, revolucioni i vitit 1989 dhe tranzicioni i trazuar i vendit në demokraci, të gjitha këto kanë qenë tema në valën e re të filmave të vendit.
Regjisorët e rinj kanë ndarë eksperiencat dhe kujtimet e tyre në mënyra që kritikët i shohin si realiste dhe të sinqerta.
Festivali i 69 i Filmit në Kanë do të zhvillohet nga 11 deri në 22 maj.
