Rreth 56 filma me temë mjedisore nga e gjithë bota do të shfaqen në qytete të ndryshme të Shqipërisë gjatë dy javëve të ardhshme, për të rritur ndërgjegjësimin dhe veprimet për mbrojtjen e natyrës.
Edicioni i katërt i Festivalit i Filmit Mjedisor 2016 u çel të hënën në Tiranë në Muzeun Historik Kombëtar, ku morën pjesë organizata të ndryshme ndërkombëtare dhe shqiptare, nën praninë edhe të zyrtarëve qeveritarë dhe përfaqësuesve të Bashkimit Europian.
Përgjatë dy javëve në vijim 56 filmat në garë do të shfaqen për publikun në qytete të ndryshme në Tiranë, Shkodër, Gjirokastër, Vlorë, Përmet, Ersekë, Çorovodë dhe Valbonë.
Filmat pjesëmarrës ekspozojnë problemet mjedisore të 29 vendeve të ndryshme të botës që nga smogu i qyteteve dhe zjarret në pyje deri te habitatet e kafshëve të egra dhe ruajtja e lumenjve.
“Filmat që do të shohim gjatë festivalit do të na ndihmojnë të gjithëve të bëhemi më të ndërgjegjshëm dhe të shohim si mundemi të veprojmë qoftë si individë, qoftë të gjithë së bashku për të mbrojtur mjedisin tonë”, tha në fjalën e saj Kryetarja e Delegacionit të BE-së në Shqipëri, Romana Vlahutin.
“Mbrojtja e mjedisit duhet të marrë vëmendje më të madhe politike, si dhe burime të mjaftueshme”, shtoi ajo Vlahutin, duke theksuar se festivali është një mundësi për të mësuar më shumë mbi çështjet globale dhe lokale të mjedisit dhe mbi zgjidhjet e mundshme.
Një traditë e nisur në vitin 2013, Festivali i Filmit Mjedisor, i mbështetur nga BE-ja, synon të ndërthurë kinemanë me shqetësimet mjedisore, duke rritur ndërgjegjësimin mbi mbrojtjen e mjedisit.
Dy javët e shfaqjes së filmave mjedisorë do të shoqërohen nga seminare mbi biodiversitetin dhe ndryshimet klimatike, ku pritet të mbahen edhe aktivitete të tjera si konkurse artistike, ekspozita fotografike dhe shfaqje e artit ekologjik.
Katër çmime për filmat me metrazh të gjatë, ato me metrazh të shkurtër, filmat eksperimentalë dhe talentet e reja do të shpërndahen për konkurrentët.
Mjedisi është kthyer në një çështje të nxehtë në Shqipëri, ku aktivistët mjedisorë kanë mbajtur një seri protestash për mbrojtjen e parkut të liqenit në Tiranë që nga shkurti, si dhe në protestën 35-ditore të mbrojtjes së lumenjve të Ballkanit që u finalizua të premten përpara kryeministrisë.
