Ndërsa afrohet afati përfundimtar i BE-së, liderët e dy partive kryesore duket se po shkojnë drejt bisedimeve të nevojshme në mënyrë urgjente për reformën në drejtësi.
Liderët e dy partive kryesore në Shqipëri, kryeministri dhe lideri i Socialistëve, Edi Rama dhe Lulzim Basha, kryetar i Partisë Demokratike, po i afrohen një takimi këtë javë për të gjetur një zgjidhje për ngërçin mbi reformën në drejtësi.
Teksa afati i fundit për të përfunduar reformat në drejtësi, të nevojshme për të hapur negociatat e pranimit në BE, i afrohet përfundimit, një takim mes liderëve shihet si urgjent, për t’i dhënë fund ngërçit dhe për t’i ofruar parlamentit të kalojë reformën në qershor.
Duke folur në intervista të ndryshme më 26 maj për Top Channel TV, si Rama dhe Basha i thanë “po” pyetjes së gazetarit rreth perspektivave të takimit për këtë reformë.
Më 27 maj, kabineti i kryeministrit Rama i kërkoi homologëve në Partinë Demokratike të fillonin negociatat rreth një takimi. Në përgjigjen e vet, kabineti i Bashës tha se takimi mund të fillojë vetëm pas 31 marsit, pasi deri atëherë Basha po merr pjesë në forumin e Partisë Popullore Europiane në Luksemburg.
Nëse takimi ndodh, dy liderët do të kenë takimin e parë kokë më kokë që nga korriku 2013, kur Basha u zgjodh kryetar i Partisë Demokratike pasi u mund në zgjedhjet e qershorit të atij viti.
Analistët në Tiranë e shohin takimin si të nevojshëm për të treguar se vullneti politik ekziston për të çuar përpara reformat në drejtësi.
Skënder Minxhozi, kryeredaktor i portalit Java Neës, i tha BIRN se është turp që takime të tilla mes rivalëve politik ndodhin kaq rrallë në Shqipëri.
“Çdo takim normal mes kundërshtarëve politikë është i mirëpritur dhe duhet të tregohet aftësia për të folur me njëri-tjetrin në një mënyrë të civilizuar edhe nëse nuk bien dakord,” tha ai.
“Takimi është i rëndësishëm, pasi është thuajse e pamundur të çosh përpara reformën që do të ndryshojë në mënyrë dramatike institucionet e vendit pa vullnet politik,” shtoi ai.
“Nga ana tjetër, përmes këtij takimi, Basha ka mundësinë të legjitimohet si kryetari i vërtetë i Partisë Demokratike dhe ta largojë veten nga influenca e Sali Berishës”, vazhdoi Minxhozi.
Lutfi Dervishi, një profesor i Universitetit të Tiranës i tha BIRN se ndërsa takimi është i rëndësishëm, politikanët nuk duhet ta përdorin atë për të blerë kohë dhe për të shtyrë reformën.
“Refroma në drejtësi është më tepër se një çështje e thjeshtë. Është një përpjekje për të krijuar një ‘republikë të re’ dhe debati politik është i nevojshëm për një ndryshim të tillë të madh,” tha ai.
“Negociatat duhet të jenë të shkurtra dhe të sakta, në mënyrë që të mos humbim më kohë, ato nuk duhet të bëhen për shou, por për të dhënë një rezultat,” shtoi ai.