Më shumë se një e katërta e kryebashkiakëve të zgjedhur së fundmi në 41 qarqet e Rumanisë, janë nën hetim ose në paraburgim për akuza të korrupsionit.
Kryetarët e 11 qarqeve rumune, të cilët u rizgjodhën në zgjedhjet lokale më 5 qershor ose janë akuzuar, ose janë nën hetim për korrupsion.
Ata u rizgjodhën, pavarësisht një studimi të kryer dy muaj para zgjedhjeve lokale i cili sugjeroi se më shumë se 82 për qind e votuesve rumunë nuk do të votonin për një person i cili është nën hetime apo në gjyq nën akuza për korrupsion.
“Është sikur rumunët po vuajnë nga sindroma e Stokholmit,” tha Septimiu Parvu nga Forumi i Ekspertëve me bazë në Bukuresht, një think- tank.
“Pavarësisht faktit se paratë e tyre po vidhen vazhdimisht dhe ata janë viktima të këtyre njerëzve në administratën publike, ata ende votojnë për ta,” tha Parvu.
Një shembull i rëndësishëm është rizgjedhja e kryetarit të Baia Mare, në veri-perëndim të Rumanisë, Katalin Çereçes.
Çereçes ka qenë kryetar i bashkisë së Baia Mare nga maji 2011 dhe në atë kohë shkaktoi protesta nga organizatat e të drejtave ndërkombëtare për planet e tij për të ngritur një mur rreth një lagje rome, në atë që ai tha se ishte një përpjekje për të kufizuar krimin.
Në prill 2016, ai u arrestua me akuza ryshfeti dhe është ende në paraburgim.
Ai e zhvilloi fushatën e tij të fundit zgjedhore nga pas hekurave përmes ndërmjetësve dhe postimeve në Facebook, dhe u rizgjodh të dielën, duke siguruar mbi 70 për qind të votave në Baia Mare.
Kryebashkiaku i Lagjes 3 të Bukureshtit, Robert Negoita, e ka mbajtur postin e tij që nga viti 2012 dhe të dielën ishte i vetmi kryetar nga shtatë të tillë në Bukuresht, që u rizgjodh me më shumë se 50 për qind të votave.
Negoita siguroi mbi 60 për qind të votave pavarësisht se është në hetim për korrupsion.
Partia e majtë Social Demokrate, PSD, kryesoi zgjedhjet lokale, përpara Partisë Kombëtare Liberale, PNL, krahut të djathtë, por disa vëzhgues thanë se gatishmëria e dukshme e njerëzve për të votuar për të dyshuarit e korrupsionit hedh hije mbi rezultatet.
“Humbësi më i madh i këtyre zgjedhjeve nuk është Partia Liberale, por ligjërimi publik anti-korrupsion. Për shumë qytetarë rumunë, një kandidat i ndershëm është në fakt vetëm një budalla që nuk di si të vjedhë,” tha gazetari Florin Negrutiu.
Rumania ende konsiderohet si një nga shtetet më të korruptuara në Bashkimin Europian dhe ka bërë përparim të kufizuar në luftën kundër korrupsionit dhe krimit të organizuar që kur u anëtarësua në BE në vitin 2007.
Por në vitet e fundit, numri i zyrtarëve të lartë të dënuar për marrje ryshfeti është rritur ndjeshëm.
Në të njëjtën kohë, ryshfeti mbetet një pjesë e jetës në të gjitha nivelet e shoqërisë. Është ende e zakonshme të paguhen të holla për të siguruar trajtim mjekësor, për të marrë dokumentet thelbësore nga zyrat qeveritare apo për të kaluar provimet shkollore dhe universitare.
