Njerëzit po e humbasin besimin në institucionet e Maqedonisë teksa destabiliteti politik në vend rritet, sipas një sondazhi të opinionit të kryer nga Institutit Ndërkombëtar Republikan.
Numri i të anketuarve që mendojnë se Maqedonia është “e qetë dhe e qëndrueshme”, ka rënë ndjeshëm nga 19 për qind që ishte në janar të këtij viti, në vetëm 5 për qind në anketën kombëtare të publikuar së fundmi nga Instituti Ndërkombëtar Republikan, IRI.
Studimi thotë se 67 për qind e të anketuarve mendojnë se vendi i tyre është më pak i qëndrueshëm sot se sa ishte një vit më parë, një rritje prej 20 pikësh në lidhje me 47 për qindëshin që tha të njëjtën gjë në janar.
“Zbulimet e vitit të kaluar mbi mbikëqyrjen e qytetarëve të Maqedonisë i dhanë një goditje të rëndë demokracisë së Maqedonisë”, tha presidenti i IRI Mark Green.
“Ky sondazh përforcon nevojën kritike nga liderët e Maqedonisë për t’u fokusuar në reformat që do të rindërtojnë besimin publik në institucionet demokratike të vendit,” shtoi ai.
Rreth 93 për qind të të anketuarve e përshkruajnë situatën në Maqedoni si kritike dhe të paqëndrueshme ose intensive dhe të pasigurt.
Më shumë se gjysma, 58 për qind, besojnë se Maqedonia po shkon në drejtim të gabuar, një rritje prej 12 për qind nga muaji janar.
“Pesimizmi mbi situatën politike duket të jetë ndikuar nga sjellja e qeverisë në lidhje me skandalin e përgjimit që doli në dritë në vitin 2015, i cili ekspozoi monitorimin e paligjshëm të mijëra shtetasve të Maqedonisë”, tha IRI.
Gjashtëdhjetë e katër për qind e të anketuarve nuk ishin dakord me vendimin e presidentit Gjorge Ivanov për faljen e zyrtarëve të implikuar në skandalin e përgjimit dhe krime të tjera të ndryshme.
Nën presion e brendshëm dhe nga BE-ja dhe SHBA-ja, Ivanov javën e kaluar e tërhoqi faljen.
Gjashtëdhjetë e tre për qind e të anketuarve thanë se mbështesin punën e Prokurorisë Speciale e cila u themelua vitin e kaluar, si pjesë e marrëveshjes së ndërmjetësuar nga BE-ka që ka si qëllim t’i japë fund krizës politike dhe është ngarkuar me hetimin e të gjitha akuzave të penale të ngritura nga skandali i përgjimeve.
Më pak se gjysma e të anketuarve, 48 për qind, thanë se besonin se ishin pjekur kushtet për të mbajtur zgjedhje të lira dhe të ndershme. Kjo paraqet një rënie nga 63 për qind në tetor 2015 dhe 59 për qind në janar 2016.
IRI tha se konteksti politik, i dëmtuar nga dy shtyrje të zgjedhjeve të parakohshme që prej fillimit të vitit për shkak të reformave të papërmbushura, mund të ketë pasur një ndikim në besimin e ulët të publikut në aftësinë për të mbajtur zgjedhje të lira dhe të ndershme.
Dyzet e një për qind e të anketuarve ishin të sigurt apo deri diku të sigurt në saktësinë e listave zgjedhore, ndërsa më shumë se një e katërta, 28 për qind, nuk besonin se vota e tyre në ditën e zgjedhjeve do të mbetet sekret.
Sondazhi u krye përmes intervistave ballë për ballë me 1104 maqedonas të moshës 18 vjeç dhe lart.
