Nacionalistët pro-rusë u përplasën me protestuesit anti-Putin përpara mbërritjes së motoçiklistëve rusë, Ujqërit e Natës, në qytetin Burgas.
Qyteti juglindor i Burgasit u zgjua mes tensioneve dhe një pranie të lartë të policisë të enjten teksa motoçiklistët nga klubi rus Ujqërit e Natës – të njohur për lidhjet e tyre të ngushta me presidentin rus Vladimir Putin – mbërritën në vend si pjesë e turneut të tyre në “Botën Sllave 2016”.
Ardhja e motoçiklistëve provokoi përplasje mes dy grupeve – njërit që kishte ardhur për të protestuar praninë e tyre në qytet dhe një tjetrit, i përbërë nga nacionalistët pro-rusë, që dyshohet se sulmuan protestuesit me shkopinj elektro-shoku.
Policia e Burgasit të enjten tha se anëtarët e të dyja grupeve ishin marrë në stacionpër të dhënë deklarata. Asnjë motoçiklist rus nuk ka marrë pjesë në këtë incident, tha policia.
Lajmi në lidhje me turne e “ujqërve”, të cilët do të kalojnë nëpër 12 vende të Europës Lindore përgjatë rrugës për në qytetin sllovak të Nitras, ka tërhequr reagime të ndryshme në Bullgari, ku disa i tremben një provokimi të Kremlinit prapa iniciativës.
Grupi fitoi famë pas pjesëmarrjes në aneksimin e rajonit të Krimesë në Ukrainë nga Rusia, pasi patrulloi rrugët e qyteve të Krimesë e Sevastopolit. Disa anëtarë të bandës janë bashkuar edhe me grupet militante pro-ruse në lindje të Ukrainës.
Disa prej dhjetëra protestuesve që u përpoqën të bllokonin mbërritjen e “ujqërve” pranë një karburanti afër Burgasit ishin me origjinë ukrainase. Ata janë organizuar vetë në rrjetet sociale, duke pretenduar se “2016 nuk është 1944”.
Rreth orës 8:30, megjithatë, një grup prej rreth 15 personash me uniforma ushtarake mbërriti në vendngjarje nga organizata ultra-nacionalishte Bashkimi “Vasil Levski” – e cila fitoi një reputacion së fundmi për organizimin e patrullave të vigjilentëve anti-emigrantë në kufirin bullgar me Turqinë.
Sipas protestuesve anti-rusë, nacionalistët sulmuan të parët.
“Ne nuk i provokuam, ata erdhën dhe na sulmuan. Na goditën me shkopinj elektro-shok dhe na grisën bluzat,” tha Ivo Doshev, njëri nga pjesëmarrësit në protestë, për uebsajtin vendas Flagman.
Vladimir Roussev, zëdhënës i Bashkimit Ushtarak “Vasil Levski”, tha për BIRN se protesta ishte një “provokim i organizuar mirë i Ukrainës”.
Ai mohoi se anëtarët e grupit të tij ishin të armatosur dhe tha se qëllimi i tyre ishte që të shoqërojnë motoçiklistët rusë në malin Shipka, ku ata kanë planifikuar të përkujtojnë një betejë historike mes Rusisë dhe Perandorisë Osmane në shekullin e 19.
Ndërkohë, “ujqit”, të cilët janë të lidhur ngushtë me Kishën Ortodokse Ruse, kanë arritur me sukses në Burgas dhe morën pjesë në një liturgji në një kishë lokale.
Atyre iu bashkua një grup i motoçiklistëve bullgarë dhe vazhduan rrugën e tyre në Shipka.
Sipas planeve të bëra, motoçiklistët do të mbërrijnë në kryeqytetin bullgar, Sofje, më 1 korrik, ku do të vizitojnë Katedralen e Alexander Nevski, që ka marrë merin nga një princ rus dhe përkujton ushtarët rusë që vdiqën duke çliruar Bullgarinë në fund të shekullit 19.
Një protestë kundër “ujqërve” po organizohet edhe në Sofje.