Kryetari i degës teknike të aeroportit të Rinasit dhe një punonjës banke u lanë në “arrest me burg”, ndërkohë që gjyqtarja u tërhoq nga gjykimi për tre të akuzuarit e tjerë dhe institucionet vazhdojnë përplasjet për tregtimin e fajit.
Gjykata e Krujës vendosi të lërë në qeli kryetarin e degës teknike të Aeroportit të Rinasit, Vangjel Nikolla dhe punonjësin e një banke të nivelit të dytë, Kujtim Picari, të cilët akuzohen nga Prokuroria si përgjegjës për dështimin e parandalimit të grabitjes së rreth 1 milionë eurove brenda pistës së aeroportit ndërkombëtar.
Masat e sigurisë për tre të akuzuarit e tjerë, punonjës të kompanisë ICTS që siguron aeroportin e Rinasit janë shtyrë, për shkak se gjyqtarja e çështjes, Enkelejda Hoxha është tërhequr nga gjykimi me pretendimin se ka konflikt interesi me të akuzuarit Bledar Blloshmi, Arben Karafili dhe Fadil Jonuzaj.
Grabitja e 995 mijë eurove ndodhi mesditën e së enjtes, kur tre persona të maskuar thyen perimetrin e sigurisë së aeroportit të Rinasit dhe vodhën paratë nën kërcënimin e armëve, në momentin që ato po transportoheshin drejt një avioni.
Sipas policisë, një person i veshur me jelek në ngjyrë portokalli me fasha fosforeshente preu drynin e portës, duke i mundësuar kalimin një makine “Mercedez Benz” ngjyrë vishnje. Grabitësit e maskuar kanë kërcënuar më pas me armë punonjësit që po tranportonin paratë dhe i kanë vjedhur ato nga makina e blinduar e shoqërisë “Nazeri 2000”.
Makina e grabitësve ka dalë më pas qetësisht nga aeroporti dhe është gjetur pak kohë më vonë e djegur nga patrullat e policisë.
Autorët e grabitjes nuk janë identifikuar ende, por të premten, Prokuroria urdhëroi arrestimin e 5 personave të cilët ishin përgjegjës për sigurinë në aeroportin e Rinasit. Pas hetimeve të para, Prokuroria akuzon punonjësit e aeroportit se nuk kishin marrë masat e nevojshme për të siguruar ambientet e brendshme të aeroportit të Rinasit, duke lënë hapësirë për grabitësit e armatosur.
Prokuroria e Përgjithshme njoftoi se çështja i ka kaluar tashmë Prokurorisë së Krimeve të Rënda, pasi dyshohet se grabitja u krye nga një “grup i strukturuar kriminal”.
Grabitja në aeroportin e Rinasit është shoqëruar me debate mes institucioneve, të cilat ia hedhin fajin njëri-tjetrit për thyerjen e sigurisë në aeroportin ndërkombëtar “Nënë Tereza”. Përmes një deklarate për mediat, drejtori i policisë së Tiranës, Evin Hodaj bëri përgjegjës koncesionarin Tirana International Airport, TIA për mungesën e kushteve të sigurisë në pistën e aeroportit.
Hodaj deklaroi se në bazë të një marrëveshjeje, siguria e perimetrit të jashtëm, e portave hyrëse të aeroportit dhe e vendqëndrimit të avionëve është “përgjegjësi ekskluzive e shoqërisë koncesionare” përmes kompanive të sigurisë.
Hodaj akuzoi gjithashtu se policia ishte njoftuar 10 minuta pas thyerjes së perimetrit të sigurisë dhe pesë minuta pas largimit të grabitësve nga aeroporti.
Tirana International Airport, përmes një deklarate për mediat të hënën i cilësoi të pasakta pretendimet e policisë dhe pretendoi se forcat e rendit, vetëm pak metra larg vendit të grabitjes janë njoftuar në kohë.
“Theksojmë se njoftimi i TIA për policinë është bërë në kohën kur makina bashkë me autorët e krimit ishte ende në vendngjarje,” thuhet në njoftimin e TIA.
“Përveç kësaj, theksojmë se punonjësit e policisë kanë qenë prezent në pistë vetëm pak metra nga ku ndodhi ngjarja,” shtohet në njoftim.
TIA sqaroi se kompania private e sigurimit, ICTS është përgjegjëse vetëm për shërbimin e sigurisë aeroportuale, që sipas saj nuk e zëvendëson dhe as e zvogëlon detyrën dhe përgjegjësinë e policisë së shtetit.
“ICTS operon e paarmatosur. E vetmja forcë e armatosur në aeroport është Policia e Shtetit,” thuhet në njoftim.
Grabitja në Rinas është bërë objekt debatesh edhe në Komisionin e Sigurisë në Kuvendin e Shqipërisë. Deputetë të Lëvizjes Socialiste për Integrim dhe të Partisë Demokratike në Komision e kanë cilësuar ngjarjen si shumë të rëndë për sigurinë kombëtare dhe i kanë bërë thirrje Prokurorisë të kryejë hetime të shpejta dhe të plota.
