Qindra emigrantë kanë mbetur të zënë në kurth në një copë toke midis Serbisë dhe Hungarisë, pasi kjo e fundit miratoi rregulla të reja më të ashpra për të kufizuar fluksin e refugjatëve.
Qindra emigrantë, kryesisht nga Afganistani, që shpresojnë të arrijnë në Europën Perëndimore nëpërmjet Hungarisë, janë bllokuar në “tokën e askujt” të enjten, pasi Hungaria aplikoi masa të rrepta të kontrollit të emigracionit duke filluar nga e marta.
Duke treguar se nuk do të tolerojnë, autoritetet hungareze këtë javë kthyen 870 emigrantët në Serbi për mungesë të dokumentacionit të rregullt, sipas njoftimeve në median serbe të enjten.
Ata u kthyen në Serbi në bazë të rregullave të reja të vendosura nga Hungaria, sipas të cilave të gjithë emigrantët që gjenden në zonën tetë kilometra nga kufiri me Serbinë duhet të kthehen pas kufirit me gardh që Hungaria e ngriti verën e kaluar.
Ndërkohë, në një kamp të improvizuar në “tokën e askujt”, rreth 500 emigrantë kanë mbetur aktualisht dhe po presin të kalojnë kufirin, kanë raportuar mediat televizive.
Autoritetet hungareze planifikojnë të dërgojnë rreth 17,000 emigrantë në Serbi, të cilët kanë mbërritur në vend transit përmes Serbisë.
Plani është të kthehen në grupe të vogla. Stacioni televiziv serb B92 raportoi të mërkurën se rreth 190 migrantë kaluan në Serbi përmes “kalimeve të improvizuara në murin kufitar hungarez”, jo përmes pikës zyrtare të kalimit Horgos.
Kryeministri serb Aleksandër Vuçiç të mërkurën tha se Serbia nuk do të ndiqte të njëjtin veprim me Hungarinë fqinje. “Serbia nuk do të imitojë Hungarinë dhe nuk do të krijojë “shfaqje” në kufijtë e vet”, tha ai në Beograd.
Kryeministri foli pasi Gyorgy Bakondi, kryekëshilltar i kryeministrit hungarez Viktor Orban, të mërkurën konfirmoi se çdo emigrant që kapen brenda kufijve hungarez pranë pikave kufitare me Serbinë dhe Kroacinë do të kthehet në atë kufi.
Autoritetet hungareze të mërkurën dërguan 6000 forca policore në kufirin me Serbinë për të ndaluar hyrjen e emigrantëve pa dokumente, raportoi media.
Përveç forcave policore shtesë, Hungaria gjithashtu po përdor helikopterë, mjete të blinduara dhe qen kufiri për të lokalizuar emigrantët, tha radiotelevizioni kombëtar serb RTS.
