Dy zyrtarët më të lartë të policisë kufitare në Bullgari dhanë dorëheqjen pasi një i dyshuar si trafikant njerëzish fitoi një tender publik për të transportuar emigrantët në qendrat e strehimit në vend.
Drejtori i rojeve kufitare, Antonio Angelov dhe zëvënësi i tij Yotko Andreev dhanë dorëheqjen të hënën pasi kryeministri i Bullgarisë Boyko Borissov i kërkoi atyre të linin pozicionin.
Thirrja e Borissov u bë pas raportimeve në media që zbuluan se një sipërmarrës i akuzuar për trafikim të emigrantëve pa dokumente në Bullgari fitoi një tender publik nga ministria e brendshme për transportin e emigrantëve që ishin arrestuar brenda vendit për në qendrat e akomodimit.
“Ky është turp, nuk di ç’të shtoj tjetër,” tha Borissov për gazetarët të hënën, duke shtuar se historia “tingëllonte si shaka”.
34-vjeçari Grigor Toshkov, pronar i kompanisë Edelvais 0707, u arrestua në fund të qershorit ndërsa ngiste një autobus që mbante 65 emigrantë, asnjë prej të cilëve me dokumenta, pranë kufirit të Bullgarisë me Turqinë.
Ai u akuzua për trafikim emigrantësh dhe u nxorr në arrest shtëpie. Toshkov madje nënshkroi një marrëveshje me prokurorinë, duke pranuar akuzat, por e tërhoqi më pas marrëveshjen.
Ndërsa ishte në arrest shtëpie, ai e transferoi kompaninë e transportit, që fitoi tenderin publik më 8 gusht te babai i tij 56-vjeçar.
Rezultoi gjithashtu se autobusi që ai përdori në përpjekje për të trafikuar emigrantë përmes Bullgarisë, ishte i njëjti me atë që policia tha se do të përdorej për tenderin e transportit të emigrantëve në qendrat e akomodimit.
Rasti ka provokuar tallje publike dhe zemërim, ndërsa ministria e brendshme bullgare është akuzuar shpesh për korrupsion dhe shkelje të tjera.
Në fund të muajit korrik, Prokuroria Speciale akuzoi katër policë për përfshirje në një rrjet të krimit të organizuar që merrej me trafikimin e njerëzve.
Ministria e brendshme bullgare emëroi Svetllan Kachikov si shefin e të rojeve kufitare.
Kachikov ka përvojë bi 20-vjeçare me rojet e kufirit dhe ato bregdetare, sipas ministrisë së brendshme.
Ai ka qënë komandant i anijes bullgare Obzor, që shpëtoi 900 emigrantët pranë ishullit grek Lesbos në shkurt, si pjesë e misionit detar Frontex Poseidon.
Ndërkohë të martën, Radio Kombëtare Bullgare raportoi se 100 oficerë të Frontex do të bashkohen me rojet bullgare në kufijtë e vendit me Turqinë dhe Serbinë.
Shumica e zyrtarëve të BE-së, 85 prej tyre, do të marrin pjesë në patrullat kufitare, ndërsa 15 të tjerë do të punojnë në pikat kufitare.
