Duke folur në Prishtinë, zv.presidenti amerikan Joe Biden tha se zyrtarët e Kosovës duhet të punojnë për normalizimin e marrëdhënieve me Serbinë në mënyrë që të bëjnë progres drejt anëtarësimit në BE.
Gjatë vizitës së tij në Prishtinë të mërkurën, zv.presidenti amerikan Joe Biden i nxiti zyrtarët e Kosovës të synojnë pajtim dhe të punojnë drejt normalizimit të marrëdhënieve me Serbinë, në mënyrë që vendi të bëjë përparim drejt anëtarësimit në Bashkimin Europian.
“E di se për shumë njerëz plagët dhe dhimbja nga lufta janë ende tepër të gjalla,” tha Biden në një konferencë për shtyp.
“Kam hyrë dhe dalë shumë herë nga ky rajon luftërash. E kam dëshmuar, e kam parë, por megjithëse këto plagë janë ende të freskëta, e vetmja mënyrë që Kosova të ecë përpara është përmes sigurimit të një të ardhme të bashkuar dhe duke çuar përpara pajtimin”, shtoi ai.
Biden argumentoi se rruga drejt progresit fillon me bashkëpunim dhe negociata paqësore me ish-armiqvtë.
“Presidenti Thaçi dhe kryeministri Mustafa kanë shfaqur zotim të madh në përparimin e procesit të dialogut me Serbinë, për të shkuar drejt normalizimit të marrëdhënieve mes Prishtinës dhe Beogradit,” tha ai.
“Të dyja palët kanë përgjegjësi të ndjekin zotimet e bëra në Bruksel. Kjo është thelbësore për përparimin e integrimit të plotë të Kosovës dhe Serbisë në Europë. Pa këtë, nuk ka gjasa të ndodhë”, shtoi ai.
Biden gjithashtu theksoi se ratifikimi i marrëveshjeve kontroverse që ka nxitur protesta në Kosovë – demarkacioni me Malin e Zi dhe krijimi i lidhjes së komunave me shumicë serbe në Kosovë – është i rëndësishëm për stabilitetin rajonal.
Në konferencën për shtyp, presidenti Thaçi tha se do të merrte përgjegjësi për zbatimin e marrëveshje të nënshkruara në Bruksel.
“Nuk mund t’i kërkojmë të tjerëve për ndihmë dhe mbështetje nëse nuk përmbushim detyrimet tona dhe unë kam besim dhe shpresë të plotë se do t’i përmbushim detyrimet dhe përgjegjësitë tona të cilat janë në interes të Kosovës, rajonit dhe të ardhmes Euro-Atlantike,” tha Thaçi.
Ai gjithashtu tha se pajtimi ishte i mundshëm dhe do të ndodhë, duke shtuar se dialogu ishte e vetmja mënyrë për të ecur përpara.
Pa ratifikimin e marrëveshjeve kontroverse dhe përparimin e çështjes për integrimin europian, “Kosova do të mbetet e vetme dhe e izoluar nga bota ose e shpërfillur nga SHBA dhe Brukseli”, shtoi Thaçi.
Biden gjithashtu inkurajoi zyrtarët në Kosovë të punojë për të luftuar korrupsionin, duke thënë se ishte “kancer” për vendin.
Më pas, Biden mori pjesë në një ceremoni emocionale në emërtimin e një rruge pranë bazës ushtarake Kamp Bondsteel sipas emrit të djalit të tij Beau Biden, i cili vdiq nga tumori në tru në moshën 46-vjeçare.
Zv.presidenti amerikan mbërriti në Kosovë pas vizitës në Serbi të hënën, ku i theksoi zyrtarëve serbë rëndësinë e dialogut me Kosovën.
