Zv.presidenti amerikan Joseph Biden ofroi ngushëllimet e tij te familjet e viktimave të bombardimeve të NATO-s në vitin 1999 dhe nxiti Serbinë dhe Kosovën të zgjidhin problemet mes tyre, gjatë vizitës së tij në Beograd.
Zv.presidenti i SHBA, Joe Biden të martën shprehu ngushëllimet e tij për viktimat e luftërave të Ballkanit, si dhe të atyre që u vranë nga fushata e bombardimeve të NATO-s kundër Serbisë në 1999.
“Kujtimet e humbjes së të afërmëve janë ende të freskëta,” tha Biden. “Ngushëllimet e mia për familjet e atyre që humbën jetën në luftërat e viteve 1990, përfshirë ata që humbën jetën për shkak të fushatës së NATO-s”.
Në mars të vitit 1999, NATO filloi një fushatë sulmesh ajrore kundër Serbisë dhe Malit të Zi për t’i detyruar forcat serbe të tërhiqeshin nga Kosova. Sipas të dhënave zyrtare të autoriteteve serbe, rreth 1200 deri në 2500 persona u vranë nga bombat e NATO-s.
Në atë kohë një senator amerikan, Biden ishte mbështetës i fortë i bombardimeve të NATO-s në vitin 1999. Ai dikur tha se puna e tij për t’i dhënë fund luftërave jugosllave ishte një nga “momentet më krenare” të karrierës së tij të gjatë politike.
Gjatë vizitës së tij në Serbi, Biden takoi kryeministrin serb Vuçiç dhe presidentin Tomislav Nikoliç.
Beogradi nuk do t’i mbështesë sanksionet e Bashkimit Europian kundër Moskës për të pasqyruar politikën e jashtme të Brukselit, tha presidenti serb Tomislav Nikoliç gjatë një takimi me Biden në Beograd.
“Nuk mund të paraqesim sanksione kundër Rusisë nëse kjo do të thotë harmonizim me politikën e jashtme të BE-së. Jemi të lidhur me Rusinë, jemi të lidhur me SHBA-në ku jetojnë një pjesë e madhe e komunitetit serb”, tha Nikoliç të martën.
Pas takimit me Vuçiç, Biden tha se Serbia ka bërë progres të madh që nga vitet 1990.
Ndërsa ishte në Beograd, Biden tha se shpreson që Serbia të marrë përgjegjësi për përfshirjen në konfliktet e viteve 1990, por shtoi se edhe vendet e tjera duhet të bëjnë të njëjtën gjë.
“Kemi disa tema në diskutimet tona dhe numri një është përparimi i dialogut me Kosovën,” tha Biden.
Që nga konflikti i vitit 1999 dhe ndërhyrja e NATO-s, Serbia ka refuzuar të njohë humbjen e Kosovës dhe shpalljen e pavarësisë së saj në 2008, duke këmbëngulur se ish-provinca mbetet pjesë integrale e territorit serb.
Megjithatë, Beogradi dhe Prishtina kanë negociuar në Bruksel që nga 2012 për çështje të shumta. Prishtina këmbëngul që Beogradi ta njohë pavarësinë e Kosovës.
Biden gjithashtu tha se përfaqësues të shoqërisë civile janë të shqetësuar rreth shtimit të korrupsionit në Serbi.
Ai i ofroi Serbisë ndihmën e SHBA në modernizimin e ushtrisë së saj, që të mund të bashkëpunonte edhe më mirë me NATO-n.
Vuçiç shprehu zotimin e Serbisë për paqen në rajon, duke paralajmëruar se vazhdimi i tensioneve në Ballkan do të çonte në përplasje të mëtejshme.
“Vetëm një shkëndijë nevojitet për kaos”, tha ai.
Gjatë vizitës së Biden, qindra anëtarë ultra-nacionalistë të Partisë Radikale Serbe, SRS, protestuan në Beograd. Shumë prej tyre veshën bluza me imazhin e kandidatit republikan për president, Donald Trump shoqëruar me sloganin “Voto për Trump!”.
Partia Radikale Serbe drejtohet nga Vojisllav Sheshel, i cili u gjykua dhe u lirua nga akuzat për krime lufte nga Gjykata Ndërkombëtare në Hagë. Radikalët janë partia e tretë më e madhe në parlamentin serb.
Pas disa orësh në Beograd, Biden u largua për në Prishtinë, ku të mërkurën do të takohet me presidentin e Kosovës Hashim Thaçi dhe kryeministrin Isa Mustafa.
Biden gjithashtu do të marrë pjesë në ceremoninë e emërimit të një rruge sipas djalit të tij të ndjerë Beau Biden pranë Kampit Bondsteel, baza kryesore e trupave të SHBA që shërbenë me forcat e NATO-s në Kosovë.