Komuniteti sirian në Bullgari i ka kërkuar autoriteteve shtetërore të hetojnë numrin në rritje të artikujve ksenofobë në media, të cilat ofendojnë refugjatët dhe emigrantët.
Shoqata Siria e Lirë dhe Shoqata e Refugjatëve Sirianë me bazë në Bullgari paralajmëruan në një konferencë shtypi të enjten se mediat në vend po e shtrembëronin negativisht imazhin e refugjatëve.
“Ne ndihemi të detyruar të falënderojmë[ shoqërinë bullgare] për tolerancën dhe ndjeshmërinë e treguar deri më tani, por dua edhe të theksojmë se propagandimi i ksenofobisë dhe intolerancës ndaj të tjerëve… çon në konflikte dhe ndarje të reja”, thanë organizatat siriane në një deklaratë të përbashkët.
Reagimi i tyre u provokua nga një artikull, i shpërndarë gjerësisht në rrjetet sociale, ku dikush që identifikohej si një 16-vjeçare siriane deklaroi se pjesa më e madhe e refugjatëve sirianë i urrejnë të krishterët dhe “mendonin vetëm t’i prisnin fytin”.
Por Akram Nayuf nga Shoqata Siria e Lirë tha se kjo ishte krejtësisht e gabuar.
“Një mysliman i vërtetë mendon se të krishterët janë vëllezërit dhe motrat e tij dhe kurrë nuk do t’i lëndonte ata,” tha Nayuf.
Mohamed Yusuf nga Shoqata e Refugjatëve Sirianë shtoi se “dikush dëshiron të përhapë frikë në shoqërinë bullgare dhe tha se propaganda e tillë duhet të ndalet”.
Organizatat siriane këmbëngulën se artikulli polemik ishte fabrikuar dhe se qëndrime të tjera ekzistojnë te refugjatët.
“Ne jetojmë në këtë vend, ne mendojmë se ky është atdheu ynë”, tha Mohamed Ez, një tjetër anëtar i Shoqatës së Refugjatëve Sirianë.
Artikuj të tillë nuk janë të pazakontë në median bullgare, ku gjuha e urrejtjes ndaj refugjatëve dhe migrantëve është rritur ndjeshëm vitet e fundit.
Sipas një studimi të kohëve të fundit nga Qendra për Demokraci në Media dhe për Modernizim Politik, pronarët e faqeve të internetit e shohin gjuhën e urrejtjes, si një mjet për të rritur lexuesit.
Instituti i Shoqërisë së Hapur në Sofje ka regjistruar edhe një shtim të gjuhës së urrejtjes, duke pretenduar se qëndrimet negative ndaj myslimanëve janë rritur nga 11 për qind në vitin 2014 në 38 për qind në vitin 2016.
Ndërkohë, numri i refugjatëve që kanë mbetur në Bullgari është rritur muajt e fundit, si rezultat i mbylljes së ashtuquajturit “itinerari ballkanik” për në Europë.
Aktualisht, rreth 2.700 azilkërkues jetojnë në gjashtë kampe refugjatësh në Bullgari, ndërsa në shkurt numri ishte 540, sipas të dhënave të fundit nga Agjencia Shtetërore për Refugjatët.
“Masat në kufirin tonë perëndimor [me Serbinë] janë rritur, ndaj kanalet janë mbyllur dhe refugjatët nuk mund të largohen për Europën Perëndimore”, tha të enjten për Nova TV drejtori i një qendre refugjatësh në një qytet jugor në Bullgari.
Përfaqësuesit e komunitetit sirian thanë se disa refugjatë kanë filluar të vijnë në Bullgari nga Gjermania dhe Suedia, pasi e kuptuan se sa të vështirë do ta kenë të integrohen atje.
“Ne kërkojmë ndihmë për ata njerëz që duan të qëndrojnë këtu, në mënyrë që të mund të mbijetojnë”, tha Mohamed Ez për BIRN.
