Bullgaria nuk do të pranojë refugjatët nga Europa Perëndimore nëse nuk ka një marrëveshje të pranimit me Turqinë nga ana e BE-së, lajmëroi të dielën kryeministri i Bullgarisë.
Kryeministri Boyko Borissov tha se Bullgaria nuk do të pranojë migrantët e kthyer nga Europa Perëndimore pa një marrëveshje mes Turqisë – duke shtuar se ai kishte informuar kancelaren gjermane Angela Merkel dhe liderë të tjerë të BE-së për qëndrimin e Bullgarisë në një takim në Berlin të shtunën.
“Mbi dy milionë migrantë po vijnë nga Alepo [në Siri] dhe Turqia është gati t’i japë fund burimeve të saj. I kam thënë me vendosmëri kolegëve europianë se ne nuk do të pranojmë asnjë migrant nëse nuk ka marrëveshje me Turqinë,” tha Borissov.
“I thashë direkt – a më imagjinoni duke pritur në aeroport që të më çoni dhjetëra mijëra refugjatë? Thjesht nuk do t’i lë avionët të vijnë,” shtoi ai.
Borissov u takua me kancelaren gjermane dhe kryeministrat e Austrisë, Kroacisë dhe Sllovenisë në Berlin për të diskutuar krizën e refugjatëve në Europë.
Një ditë më parë, Borissov në Staboll u takua me kryeministrin turk Binali Yildirim dhe presidentin Erdogan.
Yildirim i përdori bisedimet për t’i dërguar Europës një mesazh përmes Borissov, duke paralajmëruar se nëse BE-ja nuk garanton regjim pa viza për Turqinë deri në fund të tetorit, Ankaraja mund të dalë nga marrëveshja për të ndihmuar në kufizimin e valës së migrantëve në bllokun europian.
“BE-ja dhe Turqia duhet të tregojnë përpjekje të mëdha që marrëveshja të hyjnë në fuqi deri në tetor dhe për të gjetur hapat që do ta bëjnë atë funksionale më pas. Sepse, për mirë ose për keq, marrëveshja funksionon,” theksoi Borissov.
Ai tha se ndërsa Turqia nuk mund t’i bashkohet BE-së në kuptimin afatshkurtër, regjimi pa viza duhet të lehtësohet për nëpunësit publikë dhe biznesmenët turq.
Sipas të ashtuquajturit rregull i Dublinit, vendi i parë i BE-së ku shkel dhe regjistrohet një migrant ka përgjegjësinë të përballet me aplikimin e tij apo saj për azil.
Kjo do të thotë se vendet perëndimore europiane si Gjermania, Austria dhe Suedia kanë të drejtën t’i kthejnë refugjatët në Bullgari, nëse ata janë regjistruar se kanë hyrë nga Turqia.
Në takimin me Merkel dhe kolegët e saj Borissov bëri gjithashtu thirrje për më tepër solidaritet europian me Bullgarinë në kuptimin e mbrojtjes së kufirit të jashtëm të BE-së.
Ai kërkoi më tepër pajisje teknike nga BE-ja në formën e helikopterëve dhe varkave të patrullimit për nevojat e autoriteteve kufitare.
