Pasi 4.5 milionë turistë vizituan Bullgarinë nga janari në korrik, që është 16.9 për qind më shumë se e njëjta periudhë e vitit 2015, vendi parashikon që ky të jetë viti më i mirë për turizmin.
Vera e vitit 2016 mund të rezultojë më e suksesshmja në historinë e industrisë së turizmit në Bullgari, tha të martën ministrja e turizmit Nikolina Angelkova.
Ajo theksoi se pati një rritje me 20.6 për qind në numrin e turistëve të huaj që kaluan pushimet në Bullgari në korrik, raportuar nga Instituti Kombëtar i Statistikave ose NSI.
Numri i të huajve që vizituan Bullgarinë atë muaj për punë ose pushime arriti në 1.87 milionë, një numër rekord për shekullin 21.
Një total prej 4.5 milionë turistësh vizituan Bullgarinë mes janarit dhe korrikut 2016, që është 16.9 për qind më shumë se e njëjta periudhë e një viti më parë.
“Shtatë muajt e parë ishin më të fuqishmit për dhjetë vitet e fundit. Nëse mbajmë të njëjtin ritëm në gusht dhe shtator, kjo mund të jetë vera më e suksesshme”, tha Angelkova, duke shtuar se rezultatet me gjasa do t’i tejkalojnë parashikimet fillestare.
Statistikat tregojnë se turistët rusë, numri i të cilëve ra gjatë dy viteve të fundit si rezultat i sanksioneve të BE-së ndaj Rusisë, janë rikthyer në resortet e Detit të Zi të Bullgarisë.
Ata formojnë pjesën më të madhe të turistëve të huaj në korrik – 151,874, pasuar nga gjermanët, 143,308 dhe polakët 80,412.
Ndërkohë, Komisioni për Mbrojtjen e Konsumatorit raportoi një rënie në shkeljet ligjore të kryera nga bizneset e lidhura me turizmin kundrejt konsumatorëve.
Nga fillimi i sezonit veror deri më tani, komisioni tha se kishte kontrolluar 2397 zona, duke regjistruar shkelje në 6 deri në 8 për qind të rasteve.
Në sezonet e mëparshme turistike, rastet e praktikave të mashtrimit i tejkalonin zakonisht 10 për qind.
Si rezultat, në një konferencë shtypi të martën, kryetari i komisionit deklaroi se sezoni turistik ishte “i fuqishëm dhe i qetë”.
Më së tepërmi turistët janë ankuar për mungesë të menyve në restorante dhe për shërbime turistike të një cilësie më të ulët se kategoria e deklaruar.
Në raste të tjera, pronarët e restoranteve kanë deklaruar çmime më të ulëta në meny nga çmimet që i kanë faturuar konsumatorët.
Pjesa më e madhe e ankesave të huaja lidhen me cilësinë e transportit. Vetëm 8 për qind kanë paraqitur ankesa kundër shërbimeve të ofruara në vendpushime.
Ndërsa numri i turistëve të huaj në Bullgari është rritur ndjeshëm, numri i bullgarëve të cilët bëjnë pushime jashtë vendit, është rritur gjithashtu.
Destinacionet më të zakonshme të huaja për bullgarët mbeten Greqia dhe Turqia, për shkak të çmimeve, që janë të krahasueshme me ato në Bullgari, por edhe prej cilësisë më të mirë të shërbimeve.
