Zyrtarë serbë e kanë quajtur të papërshtatshme përgjigjen e presidentit të Komisionit Europian ndaj ankesave të tyre për “atmosferë anti-serbe” në Kroaci.
Kryeministri serb Aleksandër Vuçiç dhe qeveria e tij të enjten kritikuan përgjigjen që presidenti i Komisionit Europian dha për një letër që Vuçiç i dërgoi BE-së në gusht ku ankohej për politikat anti-serbe në Kroaci.
“Nuk duroj dot kur gjithçka barazohet dhe bëhen simetri dhe bilance të rreme (midis Serbisë dhe Kroacisë). Mendoj se të gjithë njerëzit e nderuar e kanë të vështirë ta durojnë këtë,” tha Vuçiç.
Vuçiç i shkroi në fillim të gushtit Presidentit të Komisionit Jean-Claude Juncker, shefes së Politikave të Jashtme të BE-së, Federica Mogherini, dhe Komisionerit të Zgjerimit të BE-se, Johannes Hahn, për të akuzuar Kroacinë se po ndiqte politika anti-serbe dhe po nxiste nacionalizëm.
“Ne kemi listuar ato me të cilat jemi përballur gjatë periudhës së kaluar, duke treguar me fakte ato që Serbia është dashur të durojë, nga monumente që ngrihen në një vend të BE-së në nder terroristësh të njohur dënuar, te rehabilitimet dhe rrëzimet e dënimeve për kriminelë të Luftës së Dytë Botërore dhe luftërave të fundit e deri tek njerëz që janë dënuar në Serbi dhe më pas janë dërguar në Kroaci për të kryer dënimet e tyre me burg, tani enden rrugëve gjasme të sëmurë në vend që të jenë në burg,” shkroi Vuçiç.
Megjithatë, agjencia e lajmeve Tanjug në Serbi raportoi se në letrën e përgjigjes, Juncker thjesht shprehu shqetësim për zhvillimet e fundit në marrëdhëniet midis Serbisë dhe Kroacisë, duke bërë thirrje për një angazhim konstruktiv dypalësh.
Edhe televizioni TV N1 i Serbisë tha gjithashtu se në përgjigjen e tij për Vuçiçin, Juncker theksoi se, sipas rregulloreve të BE-së, shtetet anëtare e kanë detyrim të sigurohen që krimet e urrejtjes të ndëshkohen ndërsa vendet kandidate pritet gjithashtu të zbatojnë të njëjtat ligje.
Zv/kryeministri i Serbisë dhe Ministri i Mbrojtjes, Nebojsa Stefanoviç, tha se do të kishte qenë më mirë nëse BE-ja nuk do të ishte përgjigjur fare.
“Shpresoj që kryeministri Vuçiç t’i durojë këto përgjigje nga Komisioni Europian dhe nga Juncker. Mendimi im është se do të kishte qenë më mirë nëse ata s’do të kishin kthyer fare përgjigje,” tha ai.
Ministri i jashtëm, Ivica Daçiç, ishte edhe më i ashpër në deklaratën e tij, duke e akuzuar BE-në se kishte bërë një sy qorr para politikave anti-serbe të Kroacisë.
“Juncker nuk dha përgjigje për asnjë nga çështjet që nxori në pah Vuçiç. Ai nuk komentoi për rehabilitimin e regjimit fashist ustash të Luftës së Dytë Botërore në Kroaci, lirimin nga akuzat të kriminelëve të luftës apo ngritjen e monumenteve për terroristët ustashë,” tha Daçiç.
Daçiç e akuzoi BE-në për standarde të dyfishta me Serbinë, gjë e cila ai tha se duhet të ndaloj.
“BE-ja nuk bën asgjë kur vjen puna te politikat antifashiste, por është gjithmonë e etur t’i mbajë leksione Serbisë kur s’u pëlqen diçka në vendin tonë,” komentoi Daçiç.
“Kjo s’mund të vazhdojë. Një fushatë anti-serbe në një nga shtetet anëtare të BE-së po vë në rrezik paqen dhe stabilitetin në rajon,” shtoi ai.
