Vëzhguesi politik thotë se dështimi i parlamentit të Kosovës për të votuar marrëveshjen e demarkacionit të kufirit me Malin e Zi ka dëmtuar besueshmërinë e vendit në shkallë ndërkombëtare.
Analisti politik nga Kosova Ilir Ibrahimi tha për BIRN se dështimi i parlamentit për të votuar marrëveshjen kufitare të demarkacionit me Malin e Zi, të cilën partnerët ndërkombëtarë të Kosovës e kanë përkrahur, kishte shkaktuar probleme në marrëdhëniet e vendit me bashkësinë ndërkombëtare, veçanërisht me SHBA-në.
“Partitë politike, po kontribuojnë me veprat e tyre në dëmtimin e kësaj marrëdhënieje; ata duhet të ekspozohen dhe t’i thuhet drejtpërdrejt se janë duke punuar kundër interesave të vendit. Kupa është mbushur dhe asnjë prej tyre nuk mund të pretendojë se po punon për të mirën e popullit”, tha Ibrahimi.
Ai shtoi se gjatë vizitës së tij të fundit në Kosovë, zv.presidenti amerikan, Joe Biden, dërgoi një mesazh shumë të qartë për palët në koalicionin qeverisës dhe ato në opozitë, që ishte se Kosova duhet të përmbushë detyrimet e saj për të marrë liberalizimin e vizave me Bashkimin Europian.
Ish-përfaqësuesi i BE-së në Kosovë, Samuel Zbogar, gjithashtu tha për “Jeta në Kosovë”, kohët e fundit se miratimi i marrëveshjes së demarkacionit të kufirit me Malin e Zi ishte një nga kushtet e Kosovës për liberalizimin e vizave.
Komiteti i Parlamentit Europian për Liritë Qytetare, Drejtësinë dhe Çështjet e Brendshme më 5 shtator do të votojë për negociatat e vendeve, shtetasit e të cilave duhet të marrin viza për të hyrë në vendet e BE-së.
Sipas Ibrahimit, “ngjarjet e 1 shtatorit, kur secila parti politike dështoi, kanë kontribuar që komuniteti ndërkombëtar të humbasë besimin te elita politike [në Kosovë].
“Pritshmëria për votimin e ratifikimit të demarkacionit mendohet se do t’i tendosë edhe më shumë këto marrëdhënie,” vazhdoi Ibrahimi, duke iu referuar marrëdhënieve tashmë të tensionuara mes partive në Kosovë. “Sipas meje, dje të gjitha palët e përfshira humbën”.
Kryeministri i Kosovës, Isa Mustafa ndërkohë tha se një arsye përse qeveria vendosi të tërheqë marrëveshjen nga axhenda e parlamentit ishte për shkak të një kërkese nga një grup parlamentar, emri i të cilit nuk u bë publik.
Ndërsa partia serbe e Kosovës, Lista Serbe, një partner i koalicionit qeverisës nuk ishte i pranishëm në mbledhje, mendohet se partia kishte vënë kushte për votimin pro marrëveshjes së demarkacionit.
Kryetari i grupit parlamentar për Lista Srbska, Sllavko Simiç duke folur për BIRN, mohoi të ketë pasur kushte të vëna.