Një qendër e re strehimi në fshatin jugor të bullgarisë, Belnichan do të ofrojë përkujdesje dhe strehim për 60 gomerë të plakur, duke i shpëtuar ata nga shitja për mish.
Streha e parë për gomerët u hap në Bullgari të enjten. Qendra e kujdesit “Lugina e Gomarit” u hap zyrtarisht nga autoritetet e komunës në qytetin Gotse Delchev dhe nga fondacioni zviceran për të drejtat e kafshëve “Veterinerët në Veprim”, që kryeson iniciativën.
Ndërtesa është pajisur me tre stalla, kullota dhe infrastrukturë për të ofruar strehë për 60 gomerë, por nëse nevojitet kapaciteti mund të dyfishohet.
Nëntë kujdestarë dhe një veteriner nga rajoni Gotse Delchev të trajnuar në Zvicër janë punësuar në strehën, që tashmë kujdeset për 17 gomerë.
“Ideja jonë është se kemi një vend ku mund t’i japim paqe gomerëve të vjetër, të dobët dhe të sëmurë dhe të kujdesemi për ta, në mënyrë që t’i kalojnë në qetësi vitet e moshës së vjetër,” tha për BTV të enjten menaxheri i “Veterinerë në Veprim” dr Konstantin Antov.
Organizata gjithashtu ka skuadra të lëvizshme që kujdesen për rreth 200 gomerë, të cilët zotërohen nga persona të ndryshëm në mbi 12 fshatra dhe qytete të vogla në rajon.
Të gjithë kafshët e moshuara të strehuara në “Luginën e Gomarit” janë dorëzuar te veterinerët nga ish-pronarët, të cilët nuk i përdorin më për punë rurale dhe që nuk mund të kujdesen më për ta.
“Të gjithë ata janë njerëz me zemër të mirë ose të moshuar, të cilët po përballen me zgjedhjen e dhurimit të gomerëve te ne apo shitjes së tyre. Ata preferojnë të na i japin neve, që do të thotë se ata i kanë dashur kafshët e tyre,” shpjegoi Dr Antov.
Ai shtoi se shpesh pronarët derdhnin lot kur dorëzonin gomerët e tyre në strehë, duke e bërë këtë “një moment shumë të veçantë”.
