Pas një operacioni të përbashkët anti-terror të policisë në Kosovë, Shqipëri dhe Maqedoni, gjykatat e Shqipërisë dhe Kosovës kanë dhënë masa sigurie të arrestit me burg për dhjetëra të dyshuar si anëtarë të një grupi pro-ISIS.
Gjykata e Krimeve të Rënda në Tiranë vendosi të hënën të mbajë në paraburgim katër shqiptarët e dyshuar për terrorizëm, të cilët refuzuan të përfaqësoheshin nga një avokat.
Të shtunën policia lajmëroi rezultatet e një operacioni rajonal anti-terrorizmit në Shqipëri, Kosovë dhe Maqedoni dhe tha se hetimet vazhdojnë ende.
Më 4 nëntor, policia shqiptare arrestoi katër shqiptarë nga mosha 30 deri në 46 vjeç, dy në Shkodër dhe dy të tjerë në Peshkopi.
Policia lajmëroi se katër të arrestuarit bashkëpunonin me njëri-tjetrin dhe shtetas të tjerë jashtë Shqipërisë dhe bënin propagandë urrejtjeje dhe rekrutim të luftëtarëve për t’iu bashkuar ISIS në Siri dhe Irak.
Policia shtoi se katër të dyshuarit mendohet se e mbështesnin ISIS me logjistikë dhe financim dhe se kishin luftuar të gjithë në zona konflikti në Lindjen e Mesme.
Megjithatë, nëna e një prej të arrestuarve në Shkodër, Jetmira Faslija i tha televizioneve se djali i saj nuk kishte lidhje me ISIS për sa ishte ajo në dijeni.
“Ai nuk ka folur kurrë në shtëpinë tonë për ISIS dhe u arrestua ndërsa flinte,” tha ajo.
Në të njëjtën ditë, shtatë persona të tjerë u arrestuan në Kosovë në qytetin e Mitrovicës, Ferizaj dhe Prishtinë, po ashtu të dyshuar për aktivitete terroriste.
Dy të dyshuar të tjerë u arrestuan si pjesë e të njëjtit operacion në Kaçanik dhe Mitrovicë në Kosovë të hënën.
Hetuesit kosovarë thanë se të arrestuarit dyshoheshin për mbështetje të aktiviteteve terroriste të ISIS dhe kishin planifikuar sulme në Kosovë dhe vende të tjera në rajon.
Prokuroria e Kosovës tha se të dyshuarit merrnin urdhra nga Lavdrim Muhaxheri, ish-lideri i luftëtarëve shqiptarë të ISIS.
Të dielën, Gjykata e Shkallës së Parë në Prishtinë vendosi t’i mbajë në paraburgim shtatë të dyshuarit. Avokatët e tyre mbrojtës e refuzuan masën e marrë nga gjykata.
Prokuroria nuk ka prova për të mbështetur akuzat, tha avokati i një prej të dyshuarve.
“Akuzat… njollosin imazhin e Kosovës si shtet,” tha ai.
Në Shqipëri, nëntë persona janë dënuar si rekrutues të 70 shqiptarëve që luftuan në konfliktin e Sirisë. Ata po vuajnë 126 vite burg në total.
Rreth 70 persona janë ndjekur penalisht për akuza terrorizmi gjatë tre viteve të fundit, por nuk janë publikuar të dhëna zyrtare në lidhje me vendimin përfundimtar të procesit të tyre gjyqësor.