Gjykata e Tiranës ka hedhur poshtë si të paligjshëm një seri urdhrash të prokurorisë për sekuestrimin e të gjithë dosjeve në Inspektoratin e Lartë të Deklarimit dhe Kontrollit të Pasurive.
Gjykata e Tiranës ka vlerësuar si jo të ligjshëm vendimin e Prokurorisë së Tiranës për të sekuestruar të gjitha deklaratat e pasurive të zyrtarëve të lartë dhe serverit qendrorë të Inspektoratit të Lartë të Deklarimit dhe Kontrollit të Pasurive.
Gjyqtari Julian Haxhiu ka vendosur të mërkurën shfuqizimin e 6 vendimeve të sekuestros të lëshuara nga Prokuroria e Tiranës, në kuadër të hetimit për kreun e ILDKPKI Shkëlqim Ganaj, si i dyshuar për veprën penale të shpërdorimit të detyrës.
Në faqen zyrtare të Gjykatës së Tiranës janë publikuar 6 vendimet për ankimimet e bëra nga ILDKPKI, me objekt “Shfuqizimin e “Vendimit te Sekuestrimit te dokumentacionit”, datë 07.11.2016 të Prokurorisë Tirane. Gjytari Haxhiu ka vendosur shviqizimin e 6 vendimeve të organit të akuzës i cili ka 10 ditë kohë për të ankimuar vendimin në Gjykatën e Apelit.
Procedimin penal i Prokurorisë së Tiranës u regjistrua më 7 nëntor 2016, kryesisht dhe pa autorë, me dyshimin se ILDKPKI nuk ka vepruar në hetimin dhe denoncimin e rasteve të përfshirjes në konflikt interesi të zyrtarëve të lartë.
Menjëherë pas këtij regjistrimi, disa oficerë të policisë gjyqësore nisën procedurat e sekuestrimit të të gjithë dosjeve të deklaratave të pasurive të dorëzuara në këtë institucion, që prej krijimit të tij.
Për të hetuar nëse kemi të bëjmë dhe me raste të tjera,veç atyre të denoncuara publikisht, prokurori Gjergji Tako ka lëshuar 7 vendime sekuestro të deklaratave të pasurive të zyrtarëve të lartë, duke përfshirë dhe serverin e institucionit.
Pak ditë më parë ILDKPKI i kërkoi Gjykatës së Tiranës heqjen e masës së sekuestros për 6 vendime të Prokurorisë, të cilat i konsideron si të pa argumentuara dhe të mbështetura në qëllime të jo të ligjshme.
“Prokuroria nuk arsyeton se përse një hetim që përfshin më pak se tre vite veprimtari dhe vetëm 3 subjekte, kërkon të sekuestrojë të gjitha të dhënat që lidhen me gjithë vitet e ushtrimit të veprimtarisë nga ILDKPKI dhe me të gjithë subjektet që mbartin detyrimin për të deklaruar pasurinë dhe interesat private”-thuhet në kërkesën ankimore, ku prokuroria akuzohet se është vënë në veprim për nisjen e hetimeve penale, për qëllime jo të ligjshme.
“Prokuroria nuk është vënë në lëvizje për qëllime të ligjshme sepse dokumentat që këkrohen dalin jashtë sferës së objektit të hetimeve të filluara, kështu që nuk kanë se si të jenë të rëndësishme në vërtetimin e fakteve, siç edhe përcaktohet në nenin 208 të Kodit të procedurës Penale”-thuhet më tej në kërkesën ankimore të ILDKPKI-së.
Albi Serani, zëdhënësi i Prokurorisë së Përgjithshme i tha BIRN se “Regjistrimi penal është nisur kryesisht pasi ka indicie dhe fakte të njohura publikisht për përfshirje të zyrtarëve të lartë në konflikt interesi, të cilat nuk janë hetuar dhe denoncuar nga ILDKPKI,” .
Si raste të njohura publikisht, ku zyrtarë të lartë janë akuzuar për konflikt interesi për pasuritë e tyre, Serani përmendi dosjet e deputetëve Rakip Suli, Valentina Leskaj dhe të ish deputetit Koço Kokëdhima. ILDKPKI nuk e ka ankimuar vendimin e prokurorisë për sekuestrimin e dosjeve të deputetëve, dhe pse në shkresën ankimore dhe këtë hetim e gjën të pa mbështetur në ligj.
Hetimi kundër kreut të Inspektoriatit të Lartë vjen në momentin kur institucioni i drejtuar nga Shkëlqim Ganaj është i përfshirë në procesin e marrjes në sitë e deklaratave të pasurisë së gjyqtarëve dhe prokurorëve, si pjesë e procesit e të vetingut që pritet të ndjekë miratimin e ligjit “Për rivlerësimin kalimtar të gjyqtarëve dhe prokurorëve në Republikën e Shqipërisë.”
Ndërkohë që Partia Demokratike dhe Unioni i Gjyqtarëve kanë ankimuar këtë ligj në Gjykatën Kushtetuese, implementimi i tij kërkohet si domosdoshmëri nga organizmat ndërkombëtar .
Gjatë një takimi me Ganajn të mërkurën, Drejtori i Përgjithshëm për Zgjerimin në Komisionin Europian, Christian Danielsson, u shpreh që Inspektoriati i Lartë ka një rol kycc në procesin e vetingut.
“Më lejoni të jemi i qartë për një gjë, është një institucion tejet i rëndësishëm sepse është thelbësore që në mënyrë të pavarur ky institucion të trajtojë çështje që kanë të bëjnë me luftën ndaj korrupsionit por edhe me reformën në drejtësi,” tha Danielsson
“Deklarimi i aseteve është pjesë e rëndësishme e rivlerësimit të gjyqtarëve dhe prokurorëve,” përfundoi ai.
