Tabloidi pro-qeveritar Informer ka akuzuar të përditshmen Danas për sjellje fashiste pasi publikoi një investigim mbi karrierën dhe ndikimin e vëllait të kryeministrit Vuçiç në partinë e tij.
Gazeta pro-qeveritare e Serbisë, Informer, e njohur për sulmet ndaj kritikëve të kryeministrit Aleksandër Vuçiç, të mërkurën në mbrëmje akuzoi në portalin e saj kryeredaktorin e të përditshmes politike liberale “Danas”, Dragoljub Petroviç si “fashist”.
Sulmi erdhi pasi Danas publikoi një artikull të martën duke detajuar karrierën e vëllait të kryeministrit dhe ndikimin e tij të dyshuar mbi Partinë Progresive Serbe.
Artikulli pa autor i Informer, titulluar “Skaji i ri fashist i Danas”, e akuzoi Petroviçin për sulm ndaj vëllait të Vuçiç, Andrej, pa prova për llogari të financierit të pasur George Soros.
Të mërkurën, Informer gjithashtu shënjestroi drejtorin e përgjithshëm të TV RTS 1, Dragan Bujoseviç, mbi një takim që ai mbajti me anëtarë të opozitës, duke e krahasuar televizionin me një bordel.
Sulmi erdhi pasi anëtarë të partive opozitare mbajtën një takim me Bujoseviç të mërkurën për të diskutuar raportimin e drejtë dhe objektiv të ngjarjeve.
Sulmet e reja vijnë një javë pasi Informer akuzoi disa media investigative në Serbi, përfshirë BIRN se po punojnë si mercenarë të huaj të CIA-s dhe të tjerëve.
Nën titullin kryesor “Amerika dhe BE-ja paguajnë gënjeshtarë dhe mashtrues, Informer akuzoi mediat dhe organizatat investigative KRIK, CINS dhe BIRN, si dhe të përditshmen Kurir, se financohen nga vende perëndimore dhe nga shërbime të inteligjencës për të destabilizuar qeverinë.
Informer njihet për stilin e tij kontrovers të raportimit. Një sondazh mbi shtypin i kryer nga Këshilli i Shtypit në Serbi zbuloi se Informer e ka thyer mbi 763 herë kodin etik të medias në vend gjatë 180 ditëve në 2016.
Raporti më i fundit i progresit të Serbisë nga Komisioni Europian i lëshuar më herët në nëntor theksoi se sulmet ndaj gazetarëve kanë qenë shqetësuese. “Kërcënimet, dhuna dhe frikësimi i gazetarëve mbetet një çështje shqetësuese,” tha raporti.
Raporti kritikoi mjedisin e frikës të krijuar në Serbi nga gazetat si Informer, kur marsin e shkuar ekspozoi një hetim gazetaresk në vazhdim të cilin po e kryente portali KRIK.