Ish-drejtoresha e Tatimeve, Briseida Shehaj akuzohet nga ish-vartësi i saj se i ka bërë presion për të firmosur një urdhër-pagesë prej 10 milionë lekësh për rimbursim TVSH-je për llogari të nipit të drejtorit rajonal.
Briseida Shehaj, ish-drejtoreshë e Përgjithshme e Tatimeve u paraqit të premten në Prokurorinë e rrethit të Shkodrës dhe dëshmoi përreth një orë mbi një çështje penale të regjistruar për një rast të paligjshëm të rimbursimit të TVSH.
E thirrur në cilësinë e personin që ka dijeni për ngjarjen, Shehaj i tha BIRN se është treguar e hapur me prokurorët dhe ka ofruar ndihmën e saj në lidhje me procedimin penal që është regjistruar në Prokurorinë e Shkodrës prej prillit 2015.
“Dëshmova për çështjen që prokurorët ishin të interesuar dhe kam ofruar bashkëpunimin tim. Nuk mund të flas për detaje për shkak të sekretit hetimor. Hetimi do të zbulojë të vërtetat e kësaj akuze”- tha Shehaj për BIRN.
Burime zyrtare të Prokurorisë konfirmuan se çështja për të cilën dëshmoi Shehaj lidhet me ndalimin në qershor të vitit 2016 të drejtuesit lokal të Tatimeve në Shkodër, Hysni Hysaj, i cili u akuzua se kishte shpërdoruar detyrën përmes rimbursimit të paligjshëm të kompanisë së nipit të tij.
Çështja penale ishte regjistruar në zyrën e Task-Forcës së Shkodrës në vitin 2015 pas kallëzimit të Agron Ramadanit, i cili mbante postin e drejtorit të Vlerësimit të të Ardhurave dhe Kontabilitetit në degën e Tatimeve të Shkodrës.
Ramadani akuzoi edhe ish-drejtoreshën e Përgjithshme të Tatimeve, Briseida Shehaj se i kishte bërë presion për të firmosur urdhër-pagesën prej 10 milionë lekësh për rimbursimin e kompanisë së nipit të drejtorit rajonal të Tatimeve në Shkodër, Hysni Hysaj.
Ai i tha BIRN se e larguan nga administrata tatimore, pasi refuzoi të hidhte firmën mbi një akt të paligjshëm.
“Ndaj meje u rrit presioni për të firmosur dokumentet e rimbursimit, kur daja i pronarit të kësaj kompanie u emërua drejtor rajonal i tatimeve në Shkodër,” i tha Ramadani BIRN-it përmes një bisede telefonike.
“Më 30 dhjetor 2014, nëpërmjet telefonit jam urdhëruar nga Shehaj që të firmosja urdhër-pagesën e këtij rimbursimi, në të kundërt do të largohesha nga puna. Pas kësaj, ndaj meje filloi procedimi administrativ që përfundoi me pushimin nga puna,” shtoi Ramadani.
Pas 43 vitesh punë në administratën shtetërore, Ramadani u shkarkua në mars 2015 me motivacionin “Moszbatim urdhëri”. Ai iu drejtua Prokurorisë së Shkodrës me kallëzim, pasi mësoi se kompania e kishte përfituar rimbursimin e TVSH-së.
Në qershor 2016, Prokuroria urdhëroi ndalimin e Hysajt me akuzën e shpërdorimit të detyrës. Megjithatë, ndalimi u quajt i paligjshëm nga gjykata dhe ish-kreu i Tatimeve të Shkodrës u hetua më pas nën masën e “detyrimit për paraqitje”.
Briseida Shehaj drejtoi për tre vite administratën tatimore të Shqipërisë, shpeshherë e kritikuar nga opozita. Në shtator 2016, ajo u emërua zv.ministre e Ekonomisë dhe vetëm dy muaj më pas u largua edhe nga ky post për arsye të pasqaruara.
E pyetur nga BIRN për akuzën e Ramadanit, Shehaj preferoi të mos jepte komente deri në vendimin e Prokurorisë.
“Administrata Tatimore ka dorëzuar në prokurori rreth 300 dosje për përfitim fiktiv me rimbursimin e TVSH-së. Sa i përket çështjes më të fundit, le të presim përfundimin e hetimeve të organit të akuzës,” tha ajo.
