Familjet e pastreha protestuan të enjten përpara parlamentit për të kërkuar rritje të buxhetit të strehimit për vitin 2017, i cili ndihmon vetëm 13 familje në nevojë për çdo bashki.
Lëvizja Rinore Egjiptiane Rome dhe një grup familjesh të pastreha protestuan të enjten përpara parlamentit, ku po diskutohej projektbuxheti 2017, për të kërkuar shtim të buxhetit për bonuset e strehimit, që ndihmojnë familjet e varfra nëpërmjet qirasë.
Me thirrjet “Shtoni buxhetin!” dhe “Duam strehim”, protestuesit e konsideruan buxhetin 2017 për strehimin si një tallje me problemin e tyre dhe i kërkuan deputetëve të shtojnë paratë për shtresat në nevojë.
“Programet e reja dhe të nevojshme të strehimit rrezikojnë të mos zbatohen për shkak të mungesës së buxhetit,” tha për BIRN, Gentian Serjani, kryetar i Lëvizjes Rinore Egjiptiane Rome.
“Ne kërkojmë që buxheti për familjet e pastreha të rritet që të përfshijë më shumë sesa vlerësimi aktual prej pesë familjesh për bashki,” shtoi ai.
Projektbuxheti i vitit 2017 jep 4.9 milionë euro për banesa (rikonstruktim dhe lehtësim kredie) dhe 0.4 milionë euro për subvencion qiraje. Sipas buxhetit të projektuar për 2017 do të ndihmohen gjithsej 751 familje të varfra ose 12 familje për bashki, tregojnë të dhënat e Fondacionit Shoqëria e Hapur për Shqipërinë.
Strategjia e Strehimit 2016-2025 llogarit 25.000 familje në nevojë strehimi, por mendohet se shifrat jozyrtare mund të jenë deri në 70.000 familje të pastreha.
Elda Feza dhe vajza e saj 12-vjeçare, Xheni, janë dy nga zërat më të fortë që i janë bashkuar protestës me thirrjet “Duam strehim”.
Familja Feza nga Elbasani, e përbërë nga tre anëtarë tashmë, ka migruar drejt Tiranës për më tepër mundësi në riciklimin e mbetjeve nga kazanët, pasi Bashkia Elbasan ka bërë një vesh shurdh ndaj problemit të tyre.
“Kemi 18 vjet që flemë me kartona rrugëve. Dua vetëm një vend ku të strehoj fëmijën tim, që të mos flemë rrugëve dhe të jetojmë me dinjitet,” tha për BIRN Elda Feza, e cila shtoi se mospërkrahja e shtetit i ka kushtuar jetën e vajzës më të madhe, e cila vdiq në moshën 18-vjeçare për shkak të mungesës së parave për operacion në mëlçi.
“Jemi që të gjithë të papunë dhe jetojmë me 3900 lekë të ndihmës sociale dhe me ato ç’ka nxjerrim nga kazanët dhe lypja. Më shumë flemë pa bukë se me bukë,” shtoi e mjeruar ajo.
Xheni, 12 vjeçe, të cilës protestuesit i kanë përkushtuar një pankartë ku shkruhet “Deputetë, a do ta ngrini kartonin për të realizuar ëndrrën e Xhenit?” thotë se ëndrra e saj më e madhe është të ketë një shtëpi dhe të shkojë në shkollë si gjithë fëmijët e tjerë.
“Ëndërroj të jemi një familje e vërtetë me një shtëpi dhe të shkoj në shkollë. 3900 lekët që na jep shteti familjes sime nuk i mjaftojnë as për të ngrënë, e jo më të mendojmë për të shkuar në shkollë e për të blerë libra,” tha për BIRN Xheni, e cila duhej të ishte nxënëse në klasën e gjashtë, nëse varfëria nuk do t’ia kërkonte të ndihmonte familjen në mbledhjen e kanoçeve.
“Njëra vajzë më vdiq, dua vetëm që t’i siguroj jetë vajzës tjetër,” përfundoi Elda Feza.
