Deputetët bullgarë kanë miratuar një ligj të ri anti-terror, që i jep pushtet të madh forcave ligjzbatuese, pavarësisht kritikave nga kundërshtarët dhe grupet e të drejtave të njeriut.
Deputetët bullgarë i dhanë një ligji të ashpër anti-terror dritën e gjelbër në një seri votimesh të mërkurën dhe të enjten.
Ndryshimet i japin policisë, ushtrisë, prokurorisë dhe shërbimeve të sigurisë pushtete të mëdha në raste të alarmit terrorist për të përgjuar të dyshuarit dhe për t’i kufizuar të drejtat civile.
Në raste të kërcënimeve terroriste, ministri i brendshëm do të marrë tagrin të fusë në jetë një plan kombëtar kundër terrorizmit që përfshin “kufizimin e pjesshëm dhe të përkohshëm të të drejtave të qytetarëve”.
Ushtrisë do t’i jepen funksione të gjera për të kërkuar dhe arrestuar njerëz. Forca fizike do të lejohet gjithashtu, në rastet kur është “e nevojës absolute”.
Periudha e lejuar e përgjimit të një të dyshuari për krime është zgjatur nga gjashtë muaj në tre vjet dhe Prokurori i Përgjithshëm do të marrë të drejtat të kërkojë përdorimin e mjeteve speciale të inteligjencës.
Që kur ligji u propozua në korrik, ka hasur me kritika të mëdha nga kundërshtarët e opozitës dhe grupet e të drejtave.
Deputetët nga Partia Socialiste Bullgare e krahut të majtë dhe Alternativa për Rilindjen Bullgare kritikuan zgjatjen e kohës së lejuar për përgjim, duke e kualifikuar si “të paarsyeshme”.
Atanas Atanasov, një deputet nga partia e djathtë Demokratët për Bullgari të Fortë, i tha BIRN se pushtetet që i jepen ministrit të brendshëm, agjencisë shtetërore të sigurisë kombëtare dhe prokurorit të përgjithshëm ishin shumë të gjera.
Një autoritet i tillë “hap mundësitë për abuzim me pushtetin politik”, tha Atanasov.
Ai i tha BIRN se fuqitë e organeve ligjzbatuese në rast të një plani antiterror tani i ngjajnë atyre të gjendjes së emergjencës, që mund të votohen vetëm nga parlamenti, jo nga një ministër i vetëm.
Deputeti, i cili është anëtar i komisionit të sigurisë në parlament, tha: “Zbatimi i urdhrave të tillë të veçantë krijon një rrezik të madh të abuzimit nga një organ [Prokurori i Përgjithshëm] që nuk është subjekt i asnjë kontrolli”.
Në korrik, grupi i të drejtave, Komiteti Bullgar i Helsinkit, u ankua se ndryshimet me shumë gjasa do të preknin të drejtat themelore të qytetarëve edhe pse ata nuk do të kishin kryer asnjë akt terrorist, apo përpjekje dhe përgatitje për akte të tilla.
Qeveria, megjithatë, ka mbrojtur nevojën për futje të një legjislacioni anti-terror për shkak se sipas saj kërcënimet ndërkombëtare po rriten.
