Dhjetëra pjesëtarë të komunitetit rom dhe egjiptian protestuan të hënën përpara Bashkisë Tiranë dhe i kërkuan kryebashkiakut Veliaj të gjejë një zgjidhje për papunësinë e shkaktuar nga vendimi për të “privatizuar” koshat e mbeturinave.
Dhjetëra pjesëtarë të komunitetit rom dhe egjiptian, të cilët e nxjerrin jetesën duke mbledhur sende të riciklueshme në kazanët e mbeturinave në Tiranë, protestuan të hënën përpara Bashkisë për të kërkuar nga kryebashkiaku Veliaj një alternativë për sigurimin e jetesës, pasi ky i fundit ka urdhëruar ndëshkimin e tyre në rast të kapjes me kanoçe dhe plastikë.
Protestuesit thanë se ndalimi i aktivitetit të tyre nga Bashkia u ka vështirësuar më shumë jetesën tashmë të varfër dhe i bënë thirrje që autoritetet të ofrojnë një alternativë punësimi për ta.
“Ne jemi mësuar të punojmë sa për të siguruar bukën e gojës. Nuk duam të punojmë në plehra, por kjo të paktën na jepte bukë. Ju keni për detyrë të bëni politikë edhe për të varfrit dhe jo vetëm për të pasurit”, tha një protestuese, e cila i bëri thirrje kryebashkiakut Veliaj të takohet me ricikluesit individualë dhe t’i ofrojë atyre një mundësi punësimi.
Duke tundur gjobat nga 2000 deri në 5000 lekë (të reja) të marra gjatë ditëve të fundit me arsyetimin “dëmtim të pronës së Bashkisë; dëmtim të kazanëve; mbledhje të materialeve të riciklueshme dhe hedhje të mbeturinave në tokë” mbledhësit e kanoçeve dhe plastikës denoncuan dhunën sistematike të ushtruar nga policia bashkiake ndaj tyre, si dhe sekuestrimin e mjeteve të transportit.
Shkëlqim Qerimi, 34 vjeç, baba i tre fëmijëve, tregoi në protestë plagët për të cilat ai akuzoi si shkaktarë oficerë të policisë.
“Po kthehesha në shtëpi me karrocën me të cilat transportoj plastikat që mbledh, kur policë të bashkisë më shtynë dhe më rrahën. Më morën karrocën pa më dhënë asnjë letër sqaruese dhe më lanë pa ndjenja në rrugë,” tha për BIRN Qerimi.
“Kam tre fëmijë për të mbajtur. Këta nuk po na lënë të ushqehemi, me mbylljen e kazanëve e vetmja gjë që mund të bëjmë për të mbijetuar është të fillojmë të vjedhim”, shtoi ai.
Ramiz Duka, 53-vjeç, gjithashtu i vetëpunësuar në mbledhjen e sendeve të riciklueshme tregoi për BIRN se është zhytur në borxhe që kur një mëngjes hasi policinë bashkiake të Tiranës.
“Kisha mbledh bidona gjithë natën, kur në mëngjes policia më kapi, më mori mjetin, më futën pesë ditë në burg dhe më nxorrën me 300 mijë lekë (të vjetra) borxh,” tha Duka, ndërsa shtoi se edhe pas pagimit të gjobës së vënë për mjetin, policia nuk ia kishte kthyer.
“Kisha dhënë gjakun e trupit për të blerë atë karrocë dhe aq kisha për të mbajtur katër fëmijët e mi,” përfundoi ai.
Një tjetër protestues, Bujar Maksuti, i cili ka përfituar nga banesat sociale të Bashkisë thotë se tashmë rrezikon të humbasë shtëpinë e dhënë me bonus qiraje, ngaqë pa shitjen e bindonave nuk mundet t’i nxjerrë paratë e nevojshme.
“Me çfarë t’i nxjerrim paratë për qira, ujë, drita dhe për t’u ushqyer, kur s’po na lënë të bëjmë dhe të vetmen gjë që dinim? Ne s’kemi ku gjejmë punë tjetër,” tha Maksuti për BIRN.
“Bashkia duhet të na sigurojë një punë ose të na lejojë të vazhdojmë mbledhjen nëpër kazanë”, shtoi ai.
Një investigim i BIRN në muajin gusht zbuloi se akuzat e kryebashkiakut Erion Veliaj për grumbulluesit individualë të mbetjeve të riciklueshme si “hajdutë” dhe “shkaktarë sëmundjesh”, si dhe ndëshkimi i tyre, fshehin interesa të një kompanie private.