Pasi presidenti Klaus Iohannis refuzoi të pranojë liderin social demokrat Liviu Dragnea si kreun e qeverisë, partia kandidoi Sevil Shhaideh, 52 vjeçe, një ish-ministre.
Kreu i Partisë Social Demokrate në Rumani, PSD, Liviu Dragnea, që fitoi zgjedhjet legjislative të 11 dhjetorit, lajmëroi të mërkurën pas konsultimeve me presidentin Klaus Iohannis se ai nuk do të synojë më postin e kryeministrit për të shmangur përplasjet e mëtejshme politike.
Në një marrëveshje me Aleancën e Liberalëve dhe Demokratëve, ALDE, për të formuar qeverinë e re, partia e tij ka nominuar një grua dhe një myslimane, ish-Ministren e Zhvillimit Rajonal, Sevil Shhaideh, 52-vjeçe.
“PSD fitoi zgjedhjet dhe kjo më jep mua të drejtën për pozicionin e kryeministrit. Por nuk dua të filloj një konflikt të padobishëm,” tha Dragnea pas takimit me presidentin. “Po, ajo është nominuar për kryeministre,” tha ai për Shhaideh, “por përgjegjësia politike gjendet te unë”.
Shhaideh, një myslimane e martuar me një biznesmen sirian dhe gjithashtu një bashkëpunëtor i ngushtë me Dragnea – i cili mori pjesë në dasmën e saj – shërbeu për një periudhë të shkurtër në 2015 si ministre e Zhvillimit Rajonal dhe Administratës Publike. Ajo ka qenë anëtare e PSD që nga korriku 2015.
Ajo vjen nga një minoritet i vogël turk në Rumani dhe ishte e para grua myslimane që u bë ministre e qeverisë në Rumani dhe është e para që u nominua për postin e kryeministres.
Iohannis do të nominojë kryeministrin e ri të enjten, pas konsultimeve me të gjitha palët parlamentare.
Megjithatë, pasi partia e dytë më e madhe politike, Liberalët, lajmëroi se nuk kanë kandidat alternativë dhe do t’i qëndrojnë grupit kryesor opozitar, Shhaideh është e vetmja kandidate.
Dragnea, 54 vjeç, më herët la të kuptohej se ai do të ishte i vetmi kandidat kryesor për postin e kryeministrit por presidenti Iohannis tha se ai nuk do të pranonte një të nominuar që është dënuar apo është edhe hetuar për ryshfet.
Dragnea ka dy dënime të pezulluara me burg për përpjekje për të manipuluar një referendum në 2012.
Ai tha se nuk kishte hequr dorë nga ëndrra e tij për t’u bërë kryeministër një ditë dhe nënkuptoi se ligji që e ndalon atë do të ndryshohet në të ardhmen e afërt.
PSD dhe ALDE kanë 250 nga 465 vende në parlamentin dydhomësh të Rumanisë.