Raportet e reja të BE-së për Kosovën dhe Serbinë listojnë çështjet gjyqësore, lirinë e medias, korrupsionin, krimin e organizuar dhe polarizimin politik si problemet kryesore që po ngadalësojnë anëtarësimin e tyre në Bashkimin Europian.
Raportuesit e Parlamentit Europian për Kosovën dhe Serbinë, Urlike Lunacek dhe Davic Mcallister, të hënën prezantuan draft-rezolutat e progresit të të dyja vendeve kundrejt anëtarësimit në Bashkimin Europian.
Arrestimi në Francë i ish-kryeministrit kosovar Ramush Haradinaj bazuar në një mandatarrest serb tërhoqi reagime të forta, përfshirë një vërejtje se marrëveshja për çështjet e drejtësisë nënshkruar nga Kosova dhe Serbia në nëntor 2016 duhej të kishte zgjidhur çështje të tilla dhe kritika se sjellje të tilla nuk ndihmojnë progresin, dialogun dhe marrëdhëniet e mira të fqinjësisë.
Marrëdhëniet mes Serbisë dhe Bosnje-Hercegovinës janë quajtur gjithashtu mezi të pranueshme në një draft-rezolutë mbi Serbinë të debatuar të hënën.
Rezoluta i bëri thirrje Serbisë të përshtasë politikën e jashtme më ngushtësisht me atë të BE-së, përfshirë politikën për Rusinë.
Serbia është vlerësuar megjithatë, për përpjekjet e saj për të përballuar krizën e migrantëve, si dhe për ndryshime të rëndësishme në ekonomi.
Puna e Serbisë drejt stabilitetit rajonal u quajt progresive megjithëse shpesh simbolike, veçanërisht kur vjen puna te ndërtimi i marrëdhënieve më të mira me vendet fqinje.
Lufta ndaj korrupsionit dhe krimit të organizuar, si dhe ruajtja e pavarësisë së gjyqësorit u përshkrua si një shqetësim madhor, teksa Serbia u vlerësua se ka bërë pak ose aspak progres.
Parlamenti Europian shprehu shqetësime për mungesën e projektit në përmirësimin e lirisë së fjalës dhe medias në Serbi.
“Kërcënimet, dhuna dhe kanosja e gazetarëve mbetet një çështje shqetësuese,” thuhej në rezolutë, ku iu bë thirrje autoriteteve serbe të hetojnë sulmet ndaj gazetarëve dhe medias dhe të sigurojnë zbatimin e ligjit për median.
Serbia gjithashtu u nxit të punonte për krijimin e një mjedisi më të mirë për punonjësit në media dhe në sektorin e OJQ-ve dhe për respektim të zyrës së Avokatit të Popullit.
Në draft-rezolutën për Kosovën, raportuesja Lunacek i bëri thirrje qeverisë të krijojë Asosacionin e Komunave Serbe.
Lunacek shprehu shqetësim rreth vazhdimisë së ekzistencës së “strukturave paralele” të drejtuara nga Serbia në Kosovë dhe bëri thirrje që ato të hiqeshin.
Kosova gjithashtu u nxit të zgjidhte demarkacionin me Malin e Zi dhe të merrej me raste të korrupsionit të lartë për të arritur liberalizimin e vizave me BE-në.
Politikanët nga të gjitha palët u nxitën të veprojnë për të mirën e qytetarëve të Kosovës, të pavarur nga Beogradi dhe të pakësojnë polarizimin politik, si dhe të punojnë për dialog mes partive.
Kosovës gjithashtu iu bë thirrje për t’u marrë vendime më vendimtare në punën për anëtarësimin në BE. Sipas rezolutës, progresi në luftën ndaj korrupsionit ka qenë shumë i ngadaltë. Raportuesja tha se anëtarësimi në Interpol dhe Europol ia vlente të merrej në konsideratë.
Parlamenti Europian shprehu keqardhje që korrupsioni dhe krimi i organizuar nuk u ndëshkua në disa zona në Kosovë, kryesisht në veriun e drejtuar nga serbët.
PE shprehu shqetësime rreth nivelit të ulët të hetimeve, ndjekjeve penale dhe dënimeve e konfiskimeve të aseteve kriminale.
Draft-rezoluta vlerësoi vendosmërinë e Kosovës për të luftuar ekstremizmin e dhunshëm, si dhe progresin e bërë në marrëveshjet teknike me Serbinë në 2016 për kadastrën, diplomat e universitetit dhe urën në Mitrovicë.