Dy vjet pas operacionit të ashpër kundër abuzimeve me energjinë elektrike, shteti shqiptar rezulton sërish borxhliu më i keq ndaj Operatorit të Sistemit të Shpërndarjes ndërsa sasia e borxheve të pambledhura vijoi të rritet.
Sasia e borxheve të subjekteve buxhetore dhe jobuxhetore ndaj Operatorit të Shpërndarjes së Energjisë Elektrike, OSHEE, u dyfishua gjatë vitit 2016 ndërsa sasia totale e borxheve të paarkëtuara të korporatës u rikthye pranë nivelit të vitit 2014, kur nisi edhe fushata e ashpër kundër abuzimeve me energjinë elektrike, bëhet e ditur nga statistikat vjetore të publikuara nga Enti Rregullator i Energjisë në bazë të detyrimeve të transparencës të imponuara nga programi i asistencës me Bankën Botërore.
Në total, OSHEE shënoi 70.7 miliardë lekë detyrime të prapambetura në fund të vitit 2016, vit në të cilin detyrimet e paarkëtuara të konsumatorëve familjarë shënuan rënie, por detyrimet e subjekteve jobuxhetore shënuan rritje të shpejtë. Detyrimet totale të paarkëtuara u rritën nga 68.8 miliardë lekë në 70.7 miliardë, me një rritje prej 2.8 për qind në bazë vjetore. Borxhet e familjarëve u reduktuan me 2.3 për qind ndërsa borxhet e subjekteve jobuxhetore, ku përfshihen kryesisht ujësjellësit nën pronësi publike, u rritën me 94 për qind. Borxhet totale prej 70.7 miliardë lekësh nuk janë shumë larg kulmit historik të dhëniar në vitin 2014, kur arritën në 71.4 miliardë lekë.
Grafik, Borxhet
Gjatë vitit 2016, OSHEE arkëtoi 58.7 miliardë lekë, nga të cilat, 9.5 miliardë qenë për faturat e lëshuara para fillimit të vitit, por gjatë këtij viti, akumuloi fatura të papaguara prej 13.9 miliardë lekësh, gjë që e rriti sasinë totale të borxheve të pambledhura.
Institucionet buxhetore dhe jobuxhetore përbëjnë më pak se 8 për qind të energjisë së shitur nga OSHEE por në fund të vitit 2016 qenë përgjegjëse për 11 për qind të totalit të faturave të paarkëtuara.
Borxhet e subjekteve buxhetore dhe jobuxhetore patën shënuar kulmin në dhjetor të vitit 2013 në nivelin 8.9 miliardë lekë, por këto borxhe u ulën në 3.6 miliardë lekë gjatë vitit 2014 si pjesë e përpjekjeve të qeverisë për të rregulluar llogaritë e buxhetit të shtetit, duke imponuar rregulla strikte në shlyerjen e faturave të energjisë. Disiplina gjithsesi nuk zgjati gjatë. Nga maji i vitit 2015, kur situata u duk se u normalizua, institucionet buxhetore dhe ato jobuxhetore filluan të akumulojnë me shpejtësi borxhe të larta duke u kthyer pothuajse në të njëjtën pikë ku qenë në dhjetor të vitit 2013.
Në shtator të vitit 2014, qeveria shqiptare shpalli nisjen e një operacioni masiv kundër vjedhjeve të energjisë elektrike, fushatë që solli arrestimin e mbi 2,700 shqiptarëve, në disa raste duke shkaktuar edhe tragjedi të rënda njerëzore, përfshirë vetëvrasjen e qytetarit Qamil Zelo, i cili u arrestua në rrethana të dyshimta dhe i dha fund jetës më 28 dhjetor 2014 pasi qe mbajtur në burg për javë të tëra në pritje të apelimit të masës së sigurisë.
Numri i madh i të arrestuarve shkaktoi mbipopullim të burgjeve në vend dhe trajtim jodinjitoz në selitë e paraburgimit.
Link Exel: Të dhënat e energjisë 2016
