Drejtorët e Drejtorisë së Pastrimit të Parave dhe Drejtorisë së Sigurimit të Informacionit të Klasifikuar-roli i të cilëve në procesin e vetingut u kundërshtua nga opozita-dhanë njëri pas tjetrit dorëheqjen.
Drejtuesit e dy institucioneve që kanë një rol të rëndësishëm në procesin e vetingut për gjyqtarët dhe prokurorët dhanë dorëheqjen të enjten, me motivacionin se “po i hapin rrugë zbatimit të reformës në drejtësi.
Alket Hyseni, drejtor i Drejtorisë së Parandalimit dhe Pastrimit të Parave dhe Arben Seferi, drejtor i Sigurimit të Informacionit të Klasifikuar u dorëhoqën njëri pas tjetrit nga postet e tyre, duke e argumentuar largimin me sulmet politike që u janë adresuar.
“Jam i përgjegjshëm se reforma në drejtësi është një proces i pakthyeshëm, e duke qenë i bindur se është në interesin e të gjithë shqiptarëve që ky proces të zhvillohet sa më shpejt, ndjej se largimi im nga funksioni që kryej do të shërbejë për të eliminuar çdo alibi të të gjithë atyre që frikësohen nga reforma dhe pikësëpari nga vettingu”, shkruan në letrën e dorëheqjes Alket Hyseni.
“Vetëm pak ditë më parë kam filluar të etiketohem si një person me anësi politike. Arsyeja është e qartë. Drejtoria e Sigurimit të Informacionit të Klasifikuar do të ketë një rol të qartë në implementimin e suksesshëm të reformës në drejtësi,” ka deklaruar Arben Seferi.
Roli që institucionet në varësi të ekzekutivit si Drejtoria e Parandalimit dhe Pastrimit të Parave apo Drejtoria e Sigurimit të Informacionit të Klasifikuar, DSIK do të kenë në procesin e vetingut është kundërshtuar ashpër nga Partia Demokratike në opozitë, duke e cilësuar këtë një mundësi që Kryeministri të kapë sistemin gjyqësor në vend. Për këtë arsye, disa muaj më parë PD paditi në Gjykatën Kushtetuese ligjin “për rivlerësimin kalimtar të gjyqtarëve dhe prokurorëve”. Në vendimin e saj, Gjykata Kushtetuese e rrëzoi këtë padi, duke i hapur rrugën procesit të vetingut.
Sipas ligjit të vetingut, institucione si Inspektoriati i Lartë i Deklarimit dhe Kontrollit të Pasurive, ai i Pastrimit të Parave apo DSIK do të furnizojë me informacione Komisionin e Pavarur të Kualifikimit dhe Kolegjin e Apelimit në drejtim të pasurisë apo integritetit të gjyqtarëve.
Dorëheqjet e dy titullarëve të lartë u përshëndetën nga kryeministri Edi Rama, përmes një statusi në Facebook.
“Faleminderit dy drejtuesve që u dorëhoqën për t’u hequr çdo alibi kundërshtarëve të Reformës në Drejtësi!Reforma nuk ndalet. Vetingu nuk shmanget,” shkruajti Rama.
Zbatimi i ligjit të vetingut është kushti kyç që Bashkimi Europian i ka vendosur Shqipërisë për hapjen e negociatave. Aktualisht, kanë mbërritur në Shqipëri anëtarët e Operacionit Ndërkombëtar të Monitorimit dhe ka nisur procesi për zgjedhjen e anëtarëve të institucioneve që do të kryejnë vetingun.
