Komisioni Qendror i Zgjedhjeve vendosi “të kërkojë informacion shtesë” duke refuzuar në këtë mënyrë kërkesën e Prokurorisë së Përgjithshme për ndërprerjen e mandatit të deputetit Armando Prenga.
Me një vendim të pazakontë, Komisioni Qendror i Zgjedhjeve vendosi sot të refuzojë kërkesën eksplicite të Prokurorisë së Përgjithshme për ndërprerjen e mandatit të deputetit socialist Armando Prenga, duke vendosur “të kërkojë informacion shtesë”, pa bërë të ditur se për çfarë informacioni shtesë ka nevojë.
“Lidhur me shqyrtimin e rezultateve të verifikimit të Prokurorisë së Përgjithshme, në zbatim të ligjit nr. 138/2015 për funksionarët publik, KQZ vendosi:
– T’i kërkohet Prokurorisë së Përgjithshme informacion shtesë në lidhje me rezultatet e verifikimit për z. Armando Prenga, deputet i Kuvendit të Shqipërisë, Qarku Lezhë“, shkruhet në vendimin e KQZ-së të marrë të premten.
Prokuroria e Përgjithshme pati njoftuar javën e kaluar se nga verifikimi i të dhënave brenda dhe jashtë Shqipërisë për deputetin Prenga, ka rezultuar se ai nuk ka deklaruar precedentët penalë në Itali në vitet 1996-1997, si dhe një vendim të formës së prerë të gjykatës së Kurbinit në Shqipëri, në të cilin është dënuar me gjobë për “falsifikim dokumentesh”.
Në bazë të këtyre të dhënave, Prokuroria deklaroi se Prenga është “në kushtet e ndalimit të ushtrimit të funksionit, në bazë të ligjit per “Verifikimin e Integritetit të personave që zgjidhen, emërohen ose ushtrojnë funksione publike””.
Po në të njëjtin njoftim, Prokuroria pati deklaruar se ka hapur hetime për Komisionin Qendror të Zgjedhjeve për veprën penale të abuzimit me detyrën, pasi, sipas prokurorisë, KQZ ka lejuar shtatë deputetë dhe pesë kryetar bashkish të kryejnë “plotësime” në formularin e vetëdeklarimit, fakt që tashmë është pranuar edhe nga KQZ.
Ligji për “Verifikimin e Integritetit të personave që zgjidhen, emërohen ose ushtrojnë funksione publike”, i njohur si ligji i dekriminalizimit të politikës dhe administratës publike, u miratua në fund të vitit 2015 me kompromis në Kuvendin e Shqipërisë pas ankesave të shumta të Partisë Demokratike në opozitë për praninë e personave me precedentë të rëndë penalë në Kuvendin e Shqipërisë, zgjedhur më së shumti nga listat shumëemërore të Partisë Socialiste.
Në bazë të ligjit, personat që kanë kryer vepra të rënda penale, si trafik i qenieve njerëzore apo trafik droge, ndalohet të marrin poste të larta publike ndërsa ata që i kanë, e humbin mandatin. Por përveç kësaj, ligji parashikon detyrimin e zyrtarëve për të deklaruar episodet penale të jetës së tyre pavarësisht nëse këto episode përbëjnë apo jo shkak për humbjen e mandatit. Dështimi në deklarimin e rasteve të dënimeve apo të arrestimeve sjell heqje të mandatit dhe përbën vepër penale.
Deri tani, dy deputetë dhe një kryebashkiak janë kapur sakaq nga ligji, ndërsa Prokuroria thotë se është në proces verifikimi të shumë rasteve të tjera. Prenga pati deklaruar në formularin e tij vetëm veprat penale të armëmbajtjes pa leje dhe të plagosjes, për të cilat aktualisht është nën hetim ndërsa prokuroria thotë se nuk ka deklaruar probleme të tjera me drejtësinë në Shqipëri dhe në Itali.
