Parlamenti Europian nxiti Komisionin të ndërmarrë masa reciproke kundër shtetasve amerikanë, pasi SHBA-ja nuk hoqi kërkesat për viza ndaj shtetasve të Bullgarisë, Rumanisë, Kroacisë, Polonisë dhe Qipros.
Eurodeputetët i kanë bërë thirrje Komisionit Europian të ndërmarrë masa reciproke kundër SHBA-së për shkak të kërkesës amerikane për viza ndaj shtetasve të Bullgarisë, Rumanisë, Kroacisë, Polonisë dhe Qipros.
Parlamentarët europianë e kanë nxitur Komisionin të miratojë masat e nevojshme ligjore “brenda dy muajve”, tha parlamenti në një rezolutë të miratuar të enjten.
“Komisioni është ligjërisht i detyruar të marrë masa të vënies së përkohshme të vizave për shtetasit amerikanë, meqënëse Uashingtoni ende nuk i ofron akses pa viza shtetasve të pesë vendeve të BE-së”, thanë deputetët.
Shtetasit nga Bullgaria, Kroacia, Qipro, Polonia dhe Rumania ende duhet të kenë viza për të hyrë në SHBA megjithë shtetasit amerikanë janë të lirë të udhëtojnë pa viza në të gjithë vendet anëtare të BE-së.
“Nëse Komisioni Europian nuk imponon viza për amerikanët brenda dy muajve, ne do të fillojmë një çështje gjyqësore për mosveprim. Ligji është një dhe i barabartë për të gjithë,” tha në një mesazh të enjten Momchil Nekov, një eurodeputet bullgar.
Nekov iu referua mekanizmit të reciprocitetit të BE-së, sipas të cilit, nëse një vend i tretë nuk heq vizat brenda 24 muajve pasi që është njoftuar nga BE-ja, Komisioni duhet të marrë masa ligjore për pezullimin e heqjes së vizave për shtetasit e tij brenda 12 muajve.
Parlamenti përmendi se një lajmërim për mosreciprocitet u dërgua në SHBA më 12 prill 2014, që do të thotë se Komisioni duhet të kishte vepruar për të bllokuar hyrjen pa viza të shtetasve amerikanë nga 12 prilli 2016.
Komisioni nuk ka marrë ende ndonjë masë ligjore kundër SHBA-së deri më tani.
Katër vende u lajmëruar rreth mos-reciprocitetit në 2014, bashkë me SHBA-në, qe Japonia, Kanadaja, Brunei dhe Australia.
Japonia, Brunei dhe Australia që atëherë hoqën vizat për shtetasit e BE-së, ndërsa Kanadaja lajmëroi se do të bëjë të njëjtën gjë për bullgarët dhe rumunët më 1 dhjetor 2017.
Pas rezolutës parlamentare, Komisioni do të duhet të bëjë një propozim ligjor për pezullimin e hyrjes pa viza të amerikanëve, që do të duhet të miratohet nga parlamenti dhe Këshilli i BE-së.
