Katër të dyshuar si xhihadistë nga Kosova – një prej tyre minoren – u arrestuan nga policia italiane në Venecia, ndërsa planifikonin një sulm në urën e famshme Rialto.
Policia dhe karabinierët italianë arrestuan të mërkurën në mbrëmje të dyshuarit si militantë islamikë nga Kosova – me leje të vlefshme qëndrimi në Itali – pas 12 bastisjeve – 10 prej të cilave në qendrën historike të Venecias, një në Mestre, në periferi të Venedikut, dhe një në Treviso.
Gazeta Express online dha emrat e të arrestuarve si Fisnik Bekaj, 24, Dake Haziraj, 25 dhe Arjan Babaj, 27. Identiteti i të miturit nuk është publikuar ende.
Sipas Daily Telegraph të Britanisë së Madhe, janë regjistruar biseda telefonike të të dyshuarve duke festuar sulmin terrorist të javës së shkuar në Londër, ku Khalid Masood, 52, i konvertuar në mysliman ngau një makinë në turmat e njerëzve që ecnin në Urën Uestminster, duke vrarë tre persona dhe më pas la të vdekur jashtë parlamentit një polic, Keith Palmer, nga sulmi me thikë.
“Ata ishin të gjithë të lidhur me ideologjinë e ISIS dhe të interesuar në sulmet e fundit, mbi të gjitha atë në Londër, të cilin e vlerësonin,” tha prokurori Adelchi D’Ippolito, sipas Telegraph.
Dyshohet se të gjithë kanë shkarkuar informacion nga faqe ekstremiste interneti se si të kryenin sulme terroriste, raportoi Telegraph, duke shtuar se, “nuk është e qartë nëse sulmi ishte i afërt”.
Dy nga të arrestuarit punonin si kamerierë në Venecia, sipas një gazete lokale, La Nuova Venezia. Një i dyshuar u arrestua në një apartament në afërsi të La Fenice, opera historike e Venecias.
“Komplimente për forcat e rendit dhe ligjit që kanë kryer këtë operacion të rëndësishëm”, tha Luigi Brugnaro, kryebashkiaku i Venecias. “Në emër të qytetit dhe të të gjithë qytetarëve, mund të shpreh vetëm falënderime të sinqerta për atë që ata po bëjnë për të garantuar sigurinë tonë.”
Rreth 100 persona janë arrestuar në Kosovë që nga shtatori 2014 me akuzën e anëtarësimit aktiv ose përkatësisë në grupet islamike, përfshirë ISIS dhe Al-Nusra.
Më shumë se 50 prej tyre janë në gjyq. Autoritetet vlerësojnë se rreth 300 shqiptarë të Kosovës i janë bashkuar ISIS dhe Al Nusra në total.
Në shkurt 2017, komandanti shqiptar i ISIS, Ridvan Haqifi, një imam nga Gjilani në Kosovë, i njohur më mirë nën emrin e tij të luftës AL-Kosovi u raportua i vdekur.
Haqifi u bë famëkeq për një video në të cilën paralajmëronte kosovarët se “ditë të zeza i prisnin”.