Indeksi i organizatës “Reporterë pa kufij” për vitin 2017 e ngriti Shqipërinë në gjashtë pozicione në fushën e lirisë së medias, ndërsa situata e gazetarisë në botë vazhdon të jetë në epokën më shqetësuese në historinë e indeksit.
Organizata “Reporterë pa kufij” vlerësoi në indeksin e vitit 2017 publikuar të mërkurën se liria e medias në Shqipëri u përmirësua me 6 vende në shkallën botërore të 180 shteteve, duke u renditur e 76-a.
Sipas organizatës që mbron lirinë e medias në botë, Shqipëria ka vend për përmirësim. Kjo rritje erdhi pas dy vitesh stanjacion të vendit në këtë drejtim.
Duke cituar raportin vjetor të Komisionit Europian, RPK tha se Shqipëria duhet ta zbatojë më mirë ligjin duke garantuar lirinë e fjalës, ndërsa shtoi se shpifja ndëshkohet me gjobë në vend të burgosjes që prej vitit 2012.
“Pavarësisht se ligjet për të drejtën e informimit janë miratuar në vitin 1999 dhe 2014, aksesi në informacionin shtetëror vazhdon të jetë i kufizuar dhe autoriteti rregullator mediatik AMA është i politizuar,” tha Reporterë pa kufij.
Në shkallë rajonale, Rumania është vendi me renditjen më të mirë në vendin e 46, ndërsa Kosova ka treguar ngritjen më të madhe në klasifikim në vendin e 82-të. Vendet me situatën më të keqe mediatike në Ballkan janë Maqedonia dhe Bullgaria.
Rënie shqetësuese në renditjet rajonale kanë pësuar Kroacia dhe Serbia, ku Reporterë pa Kufij tha se “në Kroaci hetimi i korrupsionit, krimit të organizuar dhe krimeve të luftës i bën gazetarët shpesh subjekt të fushatave denigruese”.
“Liria e medias ka rënë në rajon, por erozioni i sundimit të ligjit ka qenë më i dukshëm në Maqedoni,” tha Reporterë pa Kufij.
Megjithatë organizata shtoi se liria e medias në botë nuk ka qenë kurrë më e kërcënuar se aktualisht, ndërsa tha se kemi prekur një epokë të post të vërtetës, propagandës dhe shtypjes së lirive, veçanërisht te vendet demokratike.
Në dy vitet e fundit dy e treta e vendeve të analizuara kanë regjistruar një përkeqësim të situatës së tyre, ndërsa numri i vendeve ku situata e medias është “mirë” ose “mjaftueshëm mirë” ra me 2.3%.
Lindja e Mesme dhe Afrika e Veriut, është rajoni më i rrezikshëm dhe i vështirë për gazetarët në botë. Europa Lindore dhe Azia Qendrore është rajoni i dytë më i keq, pasuar nga Azia dhe Paqësori.
Bashkimi Europian dhe Ballkani renditen si një nga rajonet ku media është më e lirë, me një rritje prej 17.5% gjatë pesë viteve të fundit.
Vendet ekselente të renditjes ishin Norvegjia në vendin e parë, Suedia në të dytin, pasuar nga Finlanda, Danimarka dhe Holanda.
Indeksi i Lirisë së Medias në Botë rendit çdo vit 180 vende duke përdorur kriterin e pluralizmit, pavarësisë së medias dhe mjedisin e gazetarisë, vetëcensurën, mjedisin legjislativ, transparencën, infrastrukturën dhe abuzimet.
