Në Gjykatën e Lartë, procesi penal ndaj gjykatëses Majlinda Andrea dhe bashkëshortit të saj Odhise Andrea po shkon drejt fundit, ku prokuroria kërkon katër vjet burg për gjykatësen dhe pesë vjet për bashkëshortin, plus konfiskim të shumës prej 50 mijë euro për të cilën ata akuzohen se morën ryshfet për një çështje pronësie.
Akuza deklaroi sot (8 maj) në Gjykatën e Lartë pretencën në çështjen penale ndaj Majlinda Andreas, anëtare e Gjykatës së Lartë dhe bashkëshortit të saj Odhise Andrea, të akuzuar se kanë marrë një shumë prej 50 mijë eurosh nga një palë ndërgjygjëse, duke kërkuar 4 vjet burg për gjykatësen dhe 5 vjet për bashkëshortin. Prokuroria kërkoi gjithashtu heqjen e të drejtës për mbajtjen e posteve publike për gjykatësen Adrea për pesë vjet si dhe konfiskimin e shumës prej 50 mijë eurosh.
Prokuroria e Përgjithshme deklaroi në korrikun e kaluar se hetimi mbi çështjen e pronësisë për një sipërfaqe toke prej 40 hektarësh në zonën e Butrintit përfundoi me identifikimin e Odhise Andreas, në atë kohë zyrtar i Kuvendit të Shqipërisë dhe bashkëshortes së tij Majlinda, si përfitues të një shume prej 50 mijë eurosh që Odhise Andrea pati marrë nga një ndërmjetës.
Por masa e sigurisë së dhënë nga Gjykata e Lartë në ngarkim të koleges së tyre dyshohet se u dekonspirua dhe policia nuk arriti të arrestojë bashkëshortët e dyshuar për shkak se ata gjendeshin ndërkohë jashtë vendit.
Majlinda Andrea u kthye në Shqipëri disa ditë më vonë, ndërkohë që Gjykata e Lartë dha në ngarkim të saj masën e sigurisë “Pezullim nga Detyra”, gjë që i mundësoi të ndiqej në gjendje të lirë. Bashkëshorti i saj Odhise Andrea u vetëdorëzua në polici gjashtë muaj pasi qe shpallur në kërkim.
Majlinda Andrea është gjykatësja e parë e lartë që përfundon e akuzuar për marrje të mitës.
