Një ekspozitë gjermano-bullgare ku shfaqen nënkulturat e gjalla që lindën pas Perdes së Hekurt u hap në kryeqytetin bullgar, Sofje, duke nxjerrë në skenë jetesën e fshehtë që lulëzoi në vitet ’80.
Tridhjetë vjet pasi u mbajt koncerti i parë rok në Sofje, organizuar nga Lidhja e Komunistëve të Rinj në një përpjekje për të ofruar një përgjigje të institucionalizuar të lëvizjeve alternative që kishin pushtuar rininë e qytetit, një ekspozitë lëvizëse jep tashmë një pamje nga brenda të nënkulturave të kohës.
Organizuar nga Instituti Gjerman Gëte, ekspozita Geniale Dilletanten (Diletanë Gjeni) eksploron gjerësisht nënkulturat që shpërthyen në Gjermani në dekadën përpara rënies së Murit të Berlinit, por gjithashtu përfshin një program special për audiencën vendase.
Vizitorët mund të shohin një përzgjedhje unike të fotove të arkivës dhe të dokumentarëve nga vendet kult dhe ngjarjet që ishin popullore te të rinjtë e Bullgarisë gjatë asaj periudhe, si dhe shfaqje filmash, diskutime dhe koncerte, program i hapur deri më 31 maj.