Policia e Beratit ka kallëzuar në Prokurori 4 zyrtarë lokalë të bashkisë së Kuçovës, njëri prej të cilëve akuzohet se përdori makinën e punës për fushatë dhe tre tjerët se bëjnë presion për vota. Kryebashkiaku i Kuçovës, i cili përfaqëson LSI-në i quan akuzat sajesa të Partisë Socialiste.
Drejtoria e Policisë së Beratit ka kallëzuar katër zyrtarë vendorë të bashkisë së Kuçovës, që sipas saj kanë përdorur “funksionin publik për fushatën elektorale” ose dyshohet se janë përfshirë në presione për vota.
Përmes një njoftimi për shtyp, policia e Beratit deklaroi se kishte nisur një procedim penal ndaj Aleksandër Cecës-drejtor i shërbimeve në bashkinë e Kuçovës, i cili akuzohet se ka përdorur automjetin e tij të punës për fushatë. Gjithashtu, policia e Beratit ka referuar në prokurori dy drejtorë të tjerë të bashkisë së Kuçovës dhe kryetarin e njësisë administrative të Kozarës, të cilët dyshohet se kanë ushtruar presion për vota.
I kontaktuar nga BIRN, kryetari i Bashkisë së Kuçovës, Selfo Kapllani i hodhi poshtë akuzat “si sajesa dhe shpifje” të Partisë Socialiste.
“Jam njohur me akuzat përmes mediat, por i konsiderojmë ato sajesa dhe shpifje që vijnë nga Partia Socialiste. LSI ka respektuar të gjitha detyrimet e kodit zgjedhor gjatë fushatës elektorale. Ajo që i ka shkelur ato është Partia Socialiste,” reagoi Kapllani.
Denoncimet ndaj zyrtarëve të bashkisë së Kuçovës, e cila drejtohet nga përfaqësuesi i LSI erdhën ende pa kaluar mirë 24 orë nga mitingu përmbyllës i kësaj force politike në Berat.
Një burim i policisë së Beratit tha se drejtori i shërbimeve, Ceca është denoncuar nga një qytetar i Kuçovës, i cili ka thënë në polici se ai ka lëvizur me automjetin e tij të punës gjatë gjithë ditës së mërkurë për të organizuar mitingun përmbyllës të LSI në Berat. Si provë, denoncuesi ka ofruar edhe foto të zyrtarit dhe simpatizantëve të tjerë në makinën e tij të punës.
Policia e Beratit deklaroi se “sektori për krimin ekonomik dhe financiar nisi procedimin penal në gjendje të lirë ndaj funksionarit”.
Përveç Cecës, drejtoria e policisë së Beratit po verifikon informacionet për 3 zyrtarë të tjerë lokalë të LSI, dy prej të cilëve janë drejtorë dhe i treti është kryetar i një njësie administrative.
Ndaj të tre këtyre personave ka pasur një kallzim nga një qytetar për ushtrim dhune psikologjike ndaj simpatizantëve të LSI-së për të grumbulluar sa më shumë njerëz në mitingun përmbyllës-një fakt ky që mbetet për t’u verifikuar.
Pas këtyre kallzimeve, Sektori i Krimit Ekonomik dhe Financiar mësohet se i ka përciellë materialet për vlerësim Prokurorisë së Beratit, nga ku pritet dhe marrja e një vendimi nëse do të ketë procedime penale apo jo.
I pyetur nga BIRN, burime zyrtare në Prokurori thanë se po verifikojnë materialet e referuara nga policia.
Bashkia e Kuçovës ka 44 mijë zgjedhës në listat e votuesve, të cilët pritet t’u drejtohen kutive të votimit më 25 qershor. Si shumë qytete të tjera, edhe Kuçova është përfshirë në këto ditë të fundit të fushatës nga akuzat për përdorimin e administratës apo përpjekjet për blerjen e votës.