Pas vetëm dy muajsh në krye të Lëvizjes Socialiste për Integrim, Petrit Vasili deklaroi se tërhiqet si pjesë e riorganizimit të kësaj partie në opozitë dhe propozon për postin e kryetares Monika Kryemadhin, bashkëshorte e presidentit të zgjedhur Ilir Meta.
Kur sytë e shqiptarëve qenë drejtuar nga kryetari i opozitës Lulzim Basha pas humbjes spektakolare të partisë së tij në zgjedhjet e së dielës, një tjetër kryetar partie dha dorëheqjen në mënyrë të papritur. Petrit Vasili, partia e të cilit, Lëvizja Socialiste për Integrim, e përmirësoi rezultatin e vet elektoral me 42 mijë vota dhe tre mandate deputetësh shtesë në krahasim me vitin 2013, dha dorëheqjen pasi kishte mbajtur këtë post për vetëm dy muaj.
“Kryesia vendosi mënyrën e ristrukturimit dhe riorganizimit të LSI në opozitë pasi fronti ku është vendosur është front i gjerë,” deklaroi Vasili. “…Personalisht kam vendosur të paraqes dorëheqjen si kryetar i LSI dhe ia kam paraqitur këtë propozim kryesisë së LSI dhe kam marrë besimin e saj që të drejtoj grupin parlamentar të LSI,” shtoi ai.
“Në funksion të këtij dinamizimi të ri të partisë t’i propozoj LSI nga ana ime zonjën Monika Kryemadhi si kandidate për LSI bazuar jo thjesht në pozicionin e zëvendëskryetares por në radhë të parë për cilësinë politike të jashtëzakonshme”, tha Vasili.
Kryemadhi, 43 vjeç, bëhet në këtë mënyrë kryetarja e parë grua e një partie të rëndësishme në Shqipëri, por ajo është njëkohësisht bashkëshorte e Ilir Metës, i cili qe kryetar i LSI-së nga themelimi i kësaj partie deri në prill 2017, kur Meta u zgjodh President i Republikës me votat parlamentare të Partisë Socialiste.
LSI ka mbajtur pozicionin e minorancës kyçe në dy mandate qeverisëse, 2009-2013 kur qe në koalicion qeverisës me Partinë Demokratike dhe më 2013-2017, kur qe në koalicion qeverisës me Partinë Socialiste. Gjatë fushatës së fundit elektorale, si PS ashtu edhe PD e akuzuan LSI dhe parti të tjera të vogla parlamentare se e ka bazuar suksesin e vet elektoral në krijimin e një makinerie politike të mbështetur nga zhvatja e burimeve shtetërore në punësim dhe tenderë. LSI e bazoi fushatën e vet elektorale në akuzat për lidhje me oligarkë të dy partive të mëdha.
Pas zgjedhjeve, megjithëse LSI arriti të marrë mbi 223 mijë vota dhe 19 mandate deputetësh, sërish ajo humbi rolin e forcës së tretë kyçe për shkak se Partia Socialiste fitoi maxhorancën e thjeshtë në parlament duke marrë 74 deputetë nga 140. Për rrjedhojë, LSI ra në opozitë.
