Krahasuar me zgjedhjet e përgjithshme të qershorit, zgjedhjet komunale të të dielës në Kosovë treguan një rritje të mbështetjes për Ligën Demokratike të Kosovës dhe një rënie për Vetëvendosjen.
Bazuar në të dhënat paraprake nga Komisioni Qendror i Zgjedhjeve në Kosovë, analistët politikë duartrokasin performancën e Lidhjes Demokratike të Kosovës, LDK, të ish-kryeministrit Isa Mustafa, në zgjedhjet e së dielës në krahasim me zgjedhjet e përgjithshme në qershor, ndërsa u regjistrua një rënie të votave për Vetëvendosjen në opozitë.
LDK fitoi katër komuna gjatë raundit të parë të votimit të dielën – Pejë, Lipjan, Fushë Kosovë dhe Vitinë.
Partia gjithashtu do të përballet me kandidatët e tjerë në dhjetë komuna, përfshirë edhe kryeqytetin e Prishtinës.
“LDK ia ka dalë shumë mirë të qëndrojë e fortë në ato komuna që ka pasur më parë, pa patur ndonjë pretendim madhor për të fituar komuna të tjera, megjithëse Prishtina [e qeverisur nga Vetëvendosje] e çoi në balotazh,” tha për BIRN analisti nga Prishtina Imer Mushkolaj.
Një tjetër analist, Ramush Tahiri, i tha BIRN se rezultati i mirë i LDK është çudi pasi nuk pritej që të kishte fitues të qartë në secilën prej komunave me shumicë shqiptare në raundin e parë.
“Ka më shumë që nuk shkuan në balotazh nga sa pritej. Vlerësohet se askush nuk ka më shumë se 50 për qind të çdo zone elektorale, por befasia është LDK që ja treguar një ringjallje,” tha Tahiri për BIRN.
Sipas analistëve, ndërsa LDK pa një rritje të mbështetjes, Vetëvendosje humbi disa vota krahasuar me zgjedhjet e 11 qershorit, ku performoi mirë.
“Ka një rënie të Vetëvendosjes krahasuar me parashikimet sepse dukej se Vetëvendosje mund të kishte një shumicë në më tepër komuna nga sa tregojnë rezultatet aktuale,” tha Tahiri.
Mushkolaj tha gjithashtu se Vetëvendosje fitoi më pak vota nga sa pritej.
Por ai argumentoi se rezultati i Vetëvendosje ishte i mirë krahasuar me zgjedhjet lokale më 2013, ku duhej të shkohej në balotazh përpara fitores së kryebashkiakut Shpend Ahmeti.
“Krahasuar me 2013 kur Vetëvendosje kishte një rezultat shumë të dobët, tani është shumë mirë pasi është në balotazh si parti e parë dhe diku si e dytë,” tha Mushkolaj.
Sa për PDK, të dy analistët theksuan se ajo ia ka dalë të fitojë në bastionin në Drenas dhe të marrë disa balotazhe.
“PDK e ka arritur qëllimin duke shkuar në balotazhe në Mitrovicë, Prizren dhe Ferizaj, pasi e gjithë fushata është përqendruar në këto tri komuna,” thotë Mushkolaj.
“PDK-ja kishte frikë se do të humbiste batalionin e vet, Drenicën,” tha Tahiri.
Aleanca për Ardhmërinë e Kosovës, AAK, e kryeministrit të ri Ramush Haradinaj, bëri përparim pasi fitoi Deçanin dhe Junikun, sipas analistëve.
“Duket sikur performanca e kryeministrit ndikon në rezultatet e AAK-së”, tha Tahiri.
Partia e mbështetur nga Beogradi, Sprska Lista, fitoi ndërkohë nëntë nga dhjetë komuna me shumicë serbe në raundin e parë.
Tahiri tha se rezultati ishte ndikuar nga mbështetja që ka Sprska Lista nga Serbia.
Komuna e vetme me shumicë serbe që do të shkojë në balotazh është Klokot, ku Lista Sprska kryeson me 47.28 të votave.
Zëdhënësi i Komisionit Qendror të Zgjedhjeve, Valmir Elezi tha për BIRN se votimi për raundin e dytë në komunat që shkuan në balotazh, do të zhvillohet katër javë pas raundit të parë të së dielës.
“Votimi do të zhvillohet më 19 nëntor, katër javë pas ditës së zgjedhjeve për raundin e parë,” tha Elezi për BIRN.
KQZ nuk i ka publikuar ende rezultatet përfundimtare të të dielës.
