Personi kryesor në tentativën e grushtit të shtetit në Mal të Zi do të dalë të mërkurën në gjyq në Podgoricë për të dhënë versionin e tij të incidentit të para një viti.
Të mërkurën në Podgoricë pritet të dëshmojë një person kyç në gjyqin për grushtin e dyshuar të shtetit në Malin e Zi. Kjo do të jetë dëshmia e parë publike e Sasha Sindjeliç, që do të nisë çështjen e cila është fshehur nga teori komploti.
Sindjeliç, i cili ka gati një vit që mbahet nën mbrojtjen e policisë, do të shfaqet në një seancë e cila do të transmetohet drejtpërdrejt nga stacione televizive të ndryshme në vend.
Sipas prokurorisë, Sindjeliç është i vetmi person që kishte kontakt të drejtpërdrejtë me dy rusët – Eduard Shishmakov dhe Vladimir Popov, që besohet të jenë oficerë të inteligjencës ushtarake – të cilët janë akuzuar si organizatorë të komplotit të grushtit të shtetit.
Dëshmitari pritet gjithashtu të trajtojë polemikën mbi emrin e tij, pasi ai njihet nga prokuroria si Aleksandar Sindjeliç dhe si Sasha Sindjeliç nga avokatët e tij – një njeri ky i dënuar për vrasje në Kroaci në vitin 2001.
Përpara dëshmisë së tij, Gjykata e Lartë në Podgoricë konfirmoi se Sindjeliç mund të përballet me ekstradim në Kroaci, ku kërkohet për të vuajtur dënimin me 20 vjet burg.
Sindjeliç është një nga 20 shtetasit serbë, përfshirë një ish-gjeneral të policisë serbe, Bratislav Dikiç, që u arrestua në Mal të Zi
më 16 tetor në lidhje me komplotin e dyshuar.
Motivi i tyre ishte vrasja e kryeministrit Milo Djukanoviç në një grusht shteti që më pas do të sillte në pushtet opozitën pro-ruse.
Sipas hetuesve, Sindjeliç mori 200.000 euro nga rusët dhe shpërndau para te pjesëtarët e tjerë të grupit kriminal për të hartuar grushtin e shtetit.
Figura e dëshmitarit kyç është e rrethuar nga hijet e errëta, pasi ai konsiderohet si i dyshuari kryesor, por gjithashtu mund të ketë ndihmuar paraushtarakët serbë të shkojnë në Krime në favor të Rusisë.