Dy partitë e opozitës parlamentare, Partia Demokratike dhe Lëvizja Socialiste për Integrim shpallën protesta për ditën e hënë për të kundërshtuar planin e maxhorancës parlamentare për të zgjedhur me votat e parlamentit një “kryeprokuror të përkohshëm” për shkak se institucionet e reja kushtetuese që duhej të zgjidhnin kryeprokurorin nuk janë ende funksionale.
Duke e konsideruar vendimin e Partisë Socialiste për të zgjedhur një prokuror të përkohshëm si antikushtetues, Partia Demokratike njoftoi mobilizimin e mbështetësve të saj në një protestë ditën e hënë, protestë për të cilën shpalli mbështetjen edhe partia tjetër opozitare, Lëvizja Socialiste për Integrim.
Kreu i Partisë Demokratike Lulzim Basha mblodhi grupin e vet parlamentar të dielën për të organizuar protestën.
“Të hënën është detyrë e çdo qytetari që beson tek demokracia, që do të ndërtojë jetën në këtë vend dhe të mos shkojë refugjat, që do të jetojë me dinjitet dhe jo me lëmoshën e narkoqeverisë, të bashkohet me protestën tonë para Parlamentit”, deklaroi Basha.
Duke e konsideruar kryeministrin Edi Rama një “lolo të krimit”, kryetarja e partisë Lëvizja Socialiste për Integrim Monika Kryemadhi deklaroi mbështetjen e saj për protestën gjithashtu para grupit të vet parlamentar.
“Ky grup parlamentar do të ketë vlerë dhe do të ketë forcë me mbështetjen dhe përkrahjen, që jo vetëm anëtarët dhe simpatizantët e LSI, por për të gjithë ata që mendojnë se ky vend po shkon në drejtim të gabuar, të jenë nesër në 09:30 para Kuvendit të Shqipërisë”, tha Kryemadhi.
Partia Socialiste ka vendosur në mënyrë të njëanshme të shpallë mbarimin e mandatit të kryeprokurorit aktual Adriatik Llalla dhe të nisë procedurat për një kryeprokuror të ri, për shkak se Këshilli i Lartë i Prokurorisë, institucioni i parashikuar në kushtetutën e re si përgjegjësi për zgjedhjen e kryeprokurorit, nuk është krijuar ende. Javën e kaluar, deputetët socialistë në Komisionin Parlamentar të Ligjeve zgjodhi tre nga shtatë kandidatë të paraqitur si persona të vlefshëm për postin e kryeprokurorit. Por opozita e konsideron këtë një përpjekje të qeverisë për të kapur postin e kryeprokurorit dhe për të mbyllur problemet që maxhoranca ka aktualisht me drejtësinë.
Në muajin tetor, ish-ministri i Brendshëm Saimir Tahiri u vu formalisht nën hetim i dyshuar për trafik ndërkombëtar droge, ndërsa Partia Socialiste pretendoi se prokurorët përgjegjës për hetimin ndaj Tahirit kishin një “axhendë politike“.
Posti i prokurorit të përgjithshëm ka qenë një post kyç në historinë e Shqipërisë që nga koha e komunizmit, ku parlamenti zgjidhte kryeprokurorin, i cili nga ana e tij kishte autoritet të plotë mbi të gjitha procedimet penale, përfshirë edhe hetimet për zyrtarët e lartë. Për shkak të këtij konflikti të qartë interesash, reforma në drejtësi e miratuar vitin e kaluar, synoi të shkëpusë lidhjen Parlament-Kryeprokuror duke krijuar një institucion të ri të quajtur Këshilli i Lartë i Prokurorisë, i cili duhet të përzgjedhë kandidaturat për kryeprokuror para se parlamenti të votojë njërën prej kandidaturave të propozuara nga këshilli. Paralelisht me zbutjen e fuqisë së parlamentit në procesin përzgjedhës të kryeprokurorit, kushtetuta parashikon që kryeprokurori të luajë një rol administrativ në sistemin e prokurorisë, por prokuroritë e rretheve dhe një prokurori speciale për hetimin e krimit të rëndë dhe korrupsionit do të funksionojnë si autoritete më vete me një shkallë autonomie nga prokurori i përgjithshëm.
Maxhoranca socialiste pretendon se asaj i lind e drejta të zgjedhë një “prokuror të përkohshëm” për shkak se formula kushtetuese nuk mund të zbatohet menjëherë dhe se ajo nuk dëshiron të shohë Llallën të vijojë të mbajë këtë post përtej mbarimit të mandatit të tij. Adriatik Llalla u zgjodh prokuror i përgjithshëm në vitin 2011 me votat e maxhorancës së atëhershme parlamentare të përbërë nga Partia Demokratike dhe Lëvizja Socialiste për Integrim, të dyja partitë që sot janë në opozitë.
