Shtetet e Bashkuara, Britania, Franca, Gjermania dhe Italia dënuan edhe një herë përpjekjet e deputetëve të Kosovës për të anuluar ligjin që lejon krijimin e Dhomës Speciale me bazë në Hagë dhe detyrë për të gjykuar ish-luftëtarët e Ushtrisë Çlirimtare të Kosovës.
Ambasadat e SHBA-së, Britanisë, Francës, Gjermanisë dhe Italisë në Prishtinë deklaruan të enjten se ato ishin “thellësisht të shqetësuara” mbi përpjekjen aktuale të deputetëve të Kosovës për të anuluar ligjin që solli krijimin e Dhomës Speciale me bazë në Hagë.
Grupi i Pesë Vendeve, një grup informal diplomatik mbi çështjet e Kosovës, nxiti politikanët dhe institucionet e shtetit të “braktisin çdo mendim për anulimin apo rinegicimin e çfarëdolloj aspekti të Ligjit mbi Dhomën Speciale”, i cili u miratua nga deputetët në Prishtinë në vitin 2015.
“Një lëvizje e tillë vë në pikëpyetje angazhimin e Kosovës për sundimin e ligjit dhe rrezikon gjithçka që Kosova ka arritur deri tani. Ajo vë interesat e individëve të caktuar mbi interesat e shoqërisë së Kosovës,” thanë grupi i të pestëve në një deklaratë.
“Ne dënojmë një lëvizje të tillë dhe çdokush që e mbështet atë është duke refuzuar partneritetin e Kosovës me vendet e tjera,” shton deklarata.
Dhoma Speciale pritet të gjykojë udhëheqës të Ushtrisë Çlirimtare të Kosovës për krime të dyshuara të kryera gjatë dhe pas luftës së vitit 1999, përfshirë vrajse, rrëmbime, burgosje të paligjshme dhe dhunë seksuale. Gjykata pritet të dorëzojë aktakuzat e para këtë vit.
Gjykata ka një staf ndërkombëtar me bazë në Hagë, por vepron nën ligjin e Kosovës. Ajo kundërshtohet gjerësisht nga vetë Kosova, ku luftëtarët e UÇK shihen si heronj, dhe u krijua pas presionit mbi Prishtinën nga aleatët Perëndimorë.
Iniciativa për të anuluar ligjin u mbështet nga partitë e koalicionit qeverisës – Partia Demokratike e Kosovës, Aleanca për Ardhmërinë e Kosovës dhe Nisma për Kosovën.
Pas paralajmërimit nga ambasadat Perëndimore, deputetët e opozitës Lumir Abdixhiku nga Lidhja Demokratike e Kosovës dhe Ilir Deda nga Partia Alternativa bënë thirrje që koalicioni qeverisës të mos vendosë në rrezik marrëdhëniet me partnerët ndërkombëtar.
Deda tha se deklarata e lëshuar nga pesë vendet ishte një paralajmërim final për udhëheqësit e Kosovës.
“Unë besoj se nuk ka asnjë shtetas të Kosovës që mbështet kolapsin e shoqërisë sonë para përvjetorit të dhjetë të pavarësisë,” tha Deda.
Abdixhiku, partia e të cilit ka mbështetur gjithmonë themelimin e gjykatës, tha se zhvillimet e fundit ishin “një aventurë e rrezikshme me fund të paparashikueshëm”, dhe mund të krijojnë vetëm “një izolim për vendon tonë”.
Kryeministri Ramush Haradinaj pranoi të mërkurën në një intervistë me gazetën në internet IndeksOnline se anulimi i ligjit do të ketë pasoja për marrëdhëniet e Kosovës me bashkësinë ndërkombëtare. Por ai shtoi se partia e tij vijon të kundërshtojë gjykatën njësoj siç bëri kur ligji u votua fillimisht në parlament.
Haradinaj tha se nëse ligji risillet në Asamblenë e Kosovës dhe anulohet, ai do ta respektojë këtë për shkak se “Kosova nuk mund t’i shpëtojë drejtësisë” pavarësisht faktit se iniciativa ka dëmtuar marrëdhëniet ndërkombëtare.
Tentativa e parë për anulimin e ligjit dështoi më 22 dhjetor.
Iniciativa nuk u mbështet nga partia Vetevendosje në opozitë, por deputeti i saj Rexhep Selimi i tha medias se partia e tij do të votojë në favor të anulimit të ligjit.
Pesë ambasadat Perëndimore kritikuan gjithashtu një vendim të javës së kaluar të presidentit Hashim Thaçi për të falur tri ish-guerilas të Ushtrisë Çlirimtare të Kosovës, të cilët u dënuan për vrasjen e një familjeje në vitin 2001.
Thaçi më 29 dhjetor firmosi një dekret faljeje për Arben Kiqinën dhe vëllezërit Arsim Ramadani e Burim Ramadani, të cilët u burgosën për vrasjen e familjes Hajra, me motivin se babai i familjes kishte qenë oficer policie në kohën e Slobodan Milosheviçit.
