Kryesia e Asamblesë së Kosovës e ka dërguar projektligjin në qeveri, duke vazhduar para një përpjekje kontroversiale për të parandaluar funksionimin e Gjykatës Speciale të Kosovës me bazë në Hagë.
Përfaqësues të partive politike në Kosovë vendosën të hënën në një takim të presidencës së Asamblesë ta dërgojnë projektligjin në qeveri, duke avancuar kështu përpjekjen për të rrëzuar Dhomën e re të Specializuar, e cila pritet të gjykojë ish-anëtarë të Ushtrisë Çlirimtare të Kosovës për krime lufte dhe pas lufte.
“Çdo gjë që është bërë është procedurale,” tha kryetari i parlamentit Kadri Veseli pas takimit të hënën.
“Tani topi është në duart e qeverisë,” tha për mediat Glauk Konjufca, një deputet nga Vetëvendosja, duke konfirmuar se “nisma ka përparuar”.
Qeveria tani ka 30 ditë kohë për t’i kthyer përgjigje presidencës së Asamblesë në lidhje me mendimin e saj për projekt legjislacionin.
Nisma për të sfiduar ligjin erdhi pasi veteranët e UÇK-së nisën një peticion duke e quajtur gjykatën e re diskriminuese, pasi ajo do të gjykojë vetëm ish-guerilas shqiptarë të Kosovës, jo anëtarë të forcave serbe që kryen mizori gjatë luftës së viteve 1998-1999.
Nisma për revokimin e ligjit mbështetet nga partitë e koalicionit qeverisës të vendit – Partia Demokratike e Kosovës, PDK, Aleanca për Ardhmërinë e Kosovës, AAK, dhe Nisma për Kosovën, NISMA.
Shtetet e Bashkuara dhe BE-ja e dënuan përpjekjen për të revokuar legjislacionin dhe paralajmëruan se Kosova do të përfundonte edhe më e izoluar, nëse ndodhte kjo.
Një grup deputetësh fillimisht e dërgoi nismën në presidencën e Asamblesë më 22 dhjetor, por ajo u ndal sepse nuk u arrit asnjë kuorum.
Më 17 janar, një tjetër përpjekje për të revokuar ligjin dështoi kur në takimin e presidencës së Asamblesë nuk u arrit një kuorum mes presionit ndërkombëtar.
Kreu i grupit parlamentar të Lidhjes Demokratike të Kosovës, LDK, Avdullah Hoti, doli nga takimi i presidencës së Asamblesë të hënën duke përsëritur se partia e tij është kundër përpjekjes për të revokuar ligjin.
“Qëndrimi ynë dihet tashmë. LDK-ja është kundër abrogimit. Ajo ishte në rend të ditës sot. Le të shohim se si do të vazhdojë shumica parlamentare,” tha Hoti.
Dhomat e specializuara do të dëgjojnë raste që ngrihen nga një raport i Tas Forcës Investigative Speciale të BE-së, i cili thotë se zyrtarë të paidentifikuar të UÇK-së duhet të përballen me aktakuza për një “fushatë persekutimi” kundër serbëve, romëve dhe shqiptarëve të Kosovës.
Edhe pse me bazë në Hagë, Dhomat e Specializuara janë ligjërisht pjesë e sistemit gjyqësor të Kosovës, por janë të pavarura nga ai dhe kanë staf ndërkombëtar.
Ligji që e lejon atë të funksionojë u miratua në vitin 2015 nën presionin e Shteteve të Bashkuara dhe Europës.
Aktakuzat e para priten të ngrihen këtë vit.
