39 persona, mes të cilëve katër punonjës policie u arrestuan me akuzën e përfshirjes në kontrabandimin e rreth 1 mijë shqiptarëve drejt Shteteve të Bashkuara, Kanadasë dhe Mbretërisë së Bashkuar.
Policia e Shtetit njoftoi të shtunën arrestimin e 39 personave, të cilët akuzohen se janë pjesë e 7 rrjeteve kriminale ndërkombëtare në kontrabandimin e qënieve njerëzore në drejtim të Mbretësisë së Bashkuar, Shteteve të Bashkuara të Amerikës dhe Kanadasë. Drejtori i Policisë së Shtetit, Ardi Veliu tha në një konferencë për shtyp se katër punonjës policie gjenden mes të arrestuarve, ndërkohë që 12 persona të tjerë të implikuar janë shpallur në kërkim.
“…7 grupe të strukturuara kriminale, të cilat operonin në Shqipëri, Bullgari, Spanjë, Francë, Republikën Domenikane, Itali, Britani, Irlandë, ShBA e Kanada, kanë mundësuar kontrabandimin e rreth 1 mijë personave (shtetas shqiptarë) në drejtim të Mbretërisë së Bashkuar, ShBA-ve dhe Kanadasë,” tha Veliu në konferencën e përbashkët për shtyp.
Ai shtoi se hetimi zgjati disa muaj dhe u realizua në bashkëpunim me autoritetet amerikane, policitë partnere të Kosovës, Spanjës, Francës dhe Italisë si dhe organizatat policore si SELEC, Europol dhe Interpol. Të pranishëm në konferencën për shtyp ishin edhe përfaqësuesit e Prokurorisë së Krimeve të Rënda, 2 agjentë specialë të Shërbimit Diplomatik të Sigurisë të atashuar pranë ambasadës së SHBA-ve në Tiranë si dhe përfaqësues të organizatës SELEC me qendër në Rumani.
Sipas policisë, kontrabandimi i një personi drejt Mbretërisë së Bashkuar kushtonte 7 mijë paundë, ndërsa drejt SHBA-ve dhe Kanadasë 25 mijë deri në 30 mijë dollarë. Ndërkohë, emigrantët e paligjshëm pajiseshin me dokumente të falsifikuara udhëtimi apo identitete të vendeve të BE-së dhe ndiqnin itinerare të ndryshme udhëtimi përpara se të kontrabandoheshin në Mbretërinë e Bashkuar, ShBA apo Kanada.
Prania e rrjeteve të organizuara të kontrabandimit të emigrantëve të paligjshëm në Shqipëri ka qenë një shqetësim i hershëm i autoriteteve amerikane dhe atyre britanike. Në një investigim të marsit 2015, BIRN raportoi për shqetësimin e ngritur nga Ambasada Amerikane në policinë shqiptare për dhjetëfishimin e numrit të klandestinëve të kapur në kufirin mes Meksikës dhe Shteteve të Bashkuara prej vitit 2013.
Një hetim i hershëm i Prokurorisë së Krimeve të Rënda kundër rrjeteve të kontrabandimit drejt SHBA-ve dhe Kanadasë ngriti akuza ndaj shtatë personave, por një pjesë e të akuzuarve u liruan më pas nga gjykatat.
Pas operacionit që kulmoi mëngjesin e së shtunës, Policia njoftoi se hetimet vazhdojnë tashmë nga Prokuroria e Krimeve të Rënda.
