Mali i Zi pritet të miratojë një marrëveshje për lidhje më të ngushta në industrinë e mbrojtjes me Turqinë, që në vitet e fundit është bërë një aktor kryesor global në tregtinë e armëve.
Mali i Zi pritet të miratojë një marrëveshje mbi bashkëpunimin në fushën e industrisë së mbrojtjes me Turqinë, e cila synon të përmirësojë marrëdhëniet e mbrojtjes dhe ato ushtarake me Ankaranë.
Marrëveshja, të cilën BIRN e ka parë, lidhet me “prodhimin dhe tregtimin e mallrave dhe shërbimeve të mbrojtjes, mirëmbajtjen dhe mbështetjen logjistike”.
Marrëveshja gjithashtu përcakton shitje të armatimeve ushtarake dhe atyre mbrojtëse të prodhuara nga projekte të përbashkëta për vendet e treta, si dhe transferime teknologjike dhe kërkime të përbashkëta.
Qeveritë turke dhe malazeze do të formojnë një komision të përbashkët për të zbatuar marrëveshjen dhe për të zgjedhur projektet që do të kryhen në bashkëpunim.
“Informacioni i klasifikuar, dokumentet dhe hardueri e softueri sekret do të transmetohen përmes kanaleve diplomatike të qeverive”, thuhet në marrëveshje.
Ndryshe nga SHBA, Britania e Madhe apo Norvegjia, shteti i Turqisë nuk ka qenë më parë një nga partnerët kyç të Malit të Zi për tregtinë e armëve.
Ky bashkëpunim më i ngushtë ushtarak me Ankaranë po ndodh për shkak të rritjes së ndikimit turk në biznes në Malin e Zi.
Plot 400 kompani turke u regjistruan në vend në 2017, krahasuar me 76 në vitin 2016, sipas regjistrit zyrtar të biznesit.
Investimet e huaja direkte turke u rritën në 23.8 milionë euro në vitin 2017, krahasuar me 17 milionë euro vitin e mëparshëm.
Industria modeste e mbrojtjes e Malit të Zi mbështetet kryesisht në fabrikat e vjetra të epokës jugosllave, të cilat kanë shkuar drejt privatizimit në vitet e fundit.
Në sektor përfshihen: ish-fabrika shtetërore TARA e armëve në Mojkovaç, Poliex në Berane dhe një fabrikë e vogël Optel në qytetin Bijelo Polje.
Marrëveshja e re e mbrojtjes me gjasa është arritur gjatë vizitës së ministrit malazez të mbrojtjes Predrag Boshkoviç në Ankara gjatë muajit shkurt.
Ai u takua me zyrtarët më të lartë të mbrojtjes në Turqi dhe tha se bashkëpunimi midis dy vendeve në mbrojtje do të ishte një platformë për marrëdhëniet e ardhshme dhe se do të ndihmonte në modernizimin e forcave të armatosura të Malit të Zi.
Ushtria e Malit të Zi varet kryesisht nga donacionet ose nga buxheti vjetor prej 50 milionë eurosh për të modernizuar forcat përmes blerjes së armëve nga vendet perëndimore.
Në vitet e fundit Turqia është bërë një lojtar global në industrinë e mbrojtjes dhe ka qenë importuesi i gjashtë më i madh i armëve në botë nga viti 2011 deri në 2015, sipas Institutit Ndërkombëtar të Stokholmit për Hulumtime të Paqes. Eksportet e mbrojtjes turke ndërkohë arritën vlerën prej 1.5 miliardë euro në vitin 2017.
Kohët e fundit, vendi nënshkroi një marrëveshje të ngjashme me Ukrainën, si dhe një marrëveshje të re multi-milionëshe me Pakistanin.
