Pas nismës së qeverisë, kryetari i parlamentit bëri thirrje për një “ekip uniteti” që të përfaqësojë vendin në dialogun e udhëhequr nga BE-ja – por shumë deputetë s’janë aspak të bindur për këtë.
Në një letër të hapur të publikuar të hënën, kryetari i Kuvendit të Kosovës, Kadri Veseli, ka prezantuar “platformën e tij konsensuale” për bisedimet e drejtuara nga BE-ja me Serbinë në Bruksel, pas propozimit të qeverisë për një “platformë shtetërore” në bisedime.
Veseli i bëri thirrje të gjitha partive në Kosovë të bashkohen pas një konsensusi politik mbi pesë problemet kryesore me të cilat përballet Kosova: dialogu me Serbinë; krijimi i Asociacionit të komunave me shumicë serbe; krijimi i një Ushtrie të Kosovës; një axhendë për integrimin europian dhe reformën zgjedhore.
“Bashkimi i qëndrimeve dhe pasja e një platforme të përbashkët shtetërore për këtë do të ishte një garanci për përfundimin më të mirë të procesit të dialogut me Serbinë,” shkruhet në letrën dërguar partive.
“Për të arritur një qëllim të tillë, nevojitet krijimi i një ekipi të përbashkët të udhëhequr nga presidenti i Kosovës,” përfshirë liderët politikë dhe ata institucionalë, si edhe personalitete kyçe nga shoqëria civile, vazhdon ajo.
Platforma shtetërore e propozuar nga qeveria gjithashtu thotë se “Kuvendi konfirmon se presidenti dhe delegacioni i Kosovës, i cili do të krijohet në koordinim me të gjithë spektrin politik, janë të autorizuar të zhvillojnë negociata për të arritur një marrëveshje të detyrueshme në nivel ndërkombëtar”.
Kjo marrëveshje më pas duhet të jetë kuadri nëpërmjet të cilit duhet të ndodhë njohja e ndërsjellë midis Kosovës dhe Serbisë.
Platforma shtetërore e propozuar nga qeveria duhet të votohet në parlament.
Megjithatë, konsensusi për këtë nuk është i sigurt. Partia opozitare Vetëvendosja, e cila kundërshton mënyrën se si Kosova ka trajtuar deri më tani me dialogun me Serbinë, tha se e sheh nismën e Veselit si të dëmshme për Kosovën dhe si një favor për presidentin Hashim Thaçi.
“Letra synon të krijojë një ekip uniteti për një president polemik siç është Thaçi. Kjo është e gabuar dhe e dëmshme për Kosovën,” tha zëdhënësja e Vetëvendosjes Tinka Kurti për BIRN të hënën.
Kurti shtoi se Vetëvendosja është e qartë që nuk do t’i japë një përparësi të tillë dialogut me Serbinë apo kërkesave të Serbisë për Asociacionin e Komunave me Shumicë Serbe.
Të enjten, kreu i Vetëvendosjes, Albin Kurti, këmbënguli se dialogu nuk mund të vazhdohej në mënyrë kuptimplotë pa vlerësuar arritjet e tij midis vitit 2011 dhe 2017.
Ai shtoi gjithashtu se një konsensus kombëtar mund të formohej vetëm nëse parlamenti aprovon mandatin e ekipit dhe me miratimin e marrëveshjes përfundimtare në një referendum.
Një deputetet e Lidhjes Demokratike të Kosovës, LDK, Vjosa Osmani, tha për BIRN se platforma e propozuar nga qeveria ishte një gabim sepse, sipas saj, asambleja nuk ka ndonjë mekanizëm për të mbikëqyrur punën e presidentit.
Platforma thotë se presidenti është i detyruar t’i raportojë rregullisht asamblesë për procesin e dialogut.
Por, sipas Osmanit, “Nuk mendoj se do të votohet. Opozita tani duhet të jetë e mirëorganizuar dhe nuk ka asnjë arsye pse ta ndihmojë qeverinë t’i shpëtojë përgjegjësisë, duke e lënë një çështje kaq të rëndësishme në duart e një personi që s’i raporton kurrë deputetëve,” tha Osmani, duke iu referuar Thaçit.