Mes tensioneve në rritje midis dy vendeve fqinjë, Serbia s’e ka lejuar ekipin e karatesë të Kosovës të hyjë në vend, duke mos e lejuar atë të marrë pjesë në Kampionatin Europian të Karatesë në Novi Sad.
Ekipi i karatesë i Kosovës nuk u lejua të hyjë në Serbi të mërkurën në mëngjes për Kampionatin Europian të Karatesë, i cili do të mbahet në Novi Sad më 10-13 maj.
“Policia serbe në pikën kufitare të Merdares u tha krerëve të Federatës së Karatesë të Kosovës për vendimin e Ministrisë së Brendshme të Serbisë, të cilët kanë dhënë urdhër që ekipi nuk duhet të lejohet të hyjë në Serbi,” thuhet në një deklaratë nga Federata e Karatesë e Kosovës.
Një ditë më parë qeveria e Serbisë kishte vendosur që ekipi nga Kosova nuk do të lejohej të shfaqte ndonjë simbol kombëtar gjatë Kampionatit Europian të Karatesë.
Mediat serbe njoftuan se ekipi i Kosovës ishte ndaluar për “arsye proceduriale”, për mos respektim të marrëveshjes midis dy vendeve për vizitat zyrtare.
Kryeministri i Kosovës Ramush Haradinaj e dënoi vendimin e autoriteteve të Beogradit si një akt të papranueshëm “që nuk kontribuon në normalizimin e marrëdhënieve midis dy shteteve tona”.
“Autoritetet serbe u informuan nga Komiteti Olimpik i Kosovës lidhur me këtë udhëtim dhe pretendimi se nuk janë informuar me kohë është i papërshtatshëm,” shkroi Haradinaj në Facebook.
Zyra e Qeverisë së Serbisë për Kosovën ka nxjerrë një deklaratë duke thënë se “pavarësisht nga dëshira e Serbisë për të qenë një mikpritës i mirë për të gjithë atletët në Kampionatin Europian të karatesë në Novi Sad, atletët nga Kosova dhe Metohija nuk do të jenë pjesë e kësaj gare, sepse për disa prej tyre, këtë herë, sporti ishte me rëndësi dytësore”.
Të martën, të djathtët serbë paralajmëruan se do të bllokonin rrugët në qytetin serb të Novi Sadit nëse sportistët e karatesë të Kosovës mbërrinin atje për kampionatin e ardhshëm, pas vendimit të Federatës së Futbollit të Kosovës për të ndaluar një ndeshje midis klubit serb “Red Star” dhe Graçanicës, në Kosovën qendrore.
Federata e Futbollit e Kosovës refuzoi një kërkesë të “Red Star” për të luajtur një ndeshje humanitare në qytetin me shumicë etnike serbe më 9 maj, tha kreu i Federatës, Fadil Vokrri, të hënën.
“Për dy vjet ne kemi dhënë leje për ndeshjen, por këtë vit nuk do ta bëjmë këtë sepse në ndeshjen e fundit ndodhën gjëra që nuk i përkasin sportit. Kishte mesazhe ofenduese dhe për këtë arsye ne e kemi refuzuar kërkesën e “Red Star”. Ne gjithashtu kemi informuar UEFA-n se nuk do të ketë ndeshje,” tha Vokrri për gazetën Koha Ditore.
