Qeveria ka filluar të punojë me një plan të ri për ta transformuar Forcën e Sigurisë së Kosovës, FSK, në një ushtri të rregullt – pasi amendamentet kushtetuese për ta arritur këtë u konsideruan të pamundura, për shkak të vetos nga deputetët serbë.
Gazeta Koha Ditore raportoi të enjten se qeveria e Kosovës ka filluar të punojë në një “plan B” për të transformuar forcën e armatosur aktuale të FSK-së në një ushtri të rregullt.
Sipas gazetës, plani parashikon një proces tranzicioni 10-vjeçar.
Zyra e kryeministrit konfirmoi për gazetën se një paketë ligjore që ndikon te FSK-ja tashmë ishte shqyrtuar dhe pas kalimit të procedurave do të dërgohej në kabinet.
“Paketa e ligjeve për FSK-në është pranuar nga qeveria, por nuk ka vazhduar ende në një takim të qeverisë. Do t’ju informojmë kur ajo të jetë gati të vazhdojë,” citoi gazeta të ketë thënë zyra e kryeministrit.
Dokumenti, sipas gazetës, nuk parashikon transformimin e menjëhershëm të FSK-së në një ushtri, siç është tentuar tashmë prej disa vitesh, por në vend të kësaj do të heqë disa nga kufizimet në mandatin dhe misionin e FSK-së.
“Interesi i qeverisë është ta bëjë këtë sa më parë është e mundur, por gjithmonë në bashkëpunim me partnerët strategjikë të Kosovës,” thuhej në përgjigjen për gazetën, duke iu referuar kryesisht SHBA-së dhe aleatëve të tjerë Perëndimorë.
Zv/ministri i FSK-së, Burim Ramadani, tha për të njëjtën gazetë se po punonin për tranzicionin e FSK-së me qëllim avancimin e kapaciteteve të saj.
Gjatë vitit të kaluar, institucionet e Kosovës u përpoqën më kot për të ndryshuar mandatin e FSK-së dhe për ta bërë atë më shumë si një ushtri të rregullt.
Megjithatë, këto plane binin nesh me detyrimet kushtetuese që kërkonin një “shumicë të dyfishtë” në parlament – që do të thotë përkrahjen e dy të tretave të të gjithë deputetëve dhe dy të tretat e 20 deputetëve jo shqiptarë.
Deputetët serbë të Kosovës, të cilët mbajnë 10 nga 20 vendet e rezervuara për komunitetet jo shqiptare, e bllokuan nismën.
Deputetët e pakicës serbe e mbajnë qëndrimin e tyre në shumicën e çështjeve nga vetë Serbia, e cila kundërshton shtetësinë e Kosovës dhe kundërshton fuqimisht idenë që Kosova të ketë një ushtri të rregullt.
“Nuk jemi dekurajuar nga qëndrimet politike aktuale të komunitetit serb në Kosovë. Përkundrazi, ne do të vazhdojmë angazhimin tonë për ta ndryshuar këtë qëndrim. Sa herë që do të jetë e mundur, do të bëhen ndryshime kushtetuese,” tha zv/ministri i FSK-së Ramadani për Koha Ditore.
